गीत

0
1245

निक्के होंदे सपाही गलांदी ही मां
नांऽ फौजै च तां हा लखाई लेआ
मरने शा पैह्‌लें भारत मां दे
दुशमनें गी मारी मकाई लेआ।

लिपटे दिक्खी तरंगे च मिगी
केरेआं नेईं अत्थरूं, भैन मेरी
तुं’दी सद्धरां पूरियां करने लेई
बंदूकै नै ब्याह् कराई लेआ।

जिंद देसै दे कम्म लाई चलेआं
आ’ऊं अपना फर्ज नभाई चलेआं
चन्न तारें लेखा भारत दा
नांऽ दुनिया च चमकाई चलेआं
जिंद देसै दे कम्म लाई चलेआं ।

अग्गें दुशमन ढुक्कन दित्ता नेईं
हौसला बिंद मुक्कन दित्ता नेई
उच्चा करियै तरंगा झुलाई चलेआं
आ’ऊं अपना फर्ज नभाई चलेआं
जिंद देसै दे कम्म लाई चलेआं ।

खीरी साहें तक्क हा लड़दा रेहा
इतिहास नमां हा घड़दा रेहा
दुशमनें दे छक्के छुड़ाई चलेआं
आ’ऊं अपना फर्ज नभाई चलेआं
जिंद देसै दे कम्म लाई चलेआं ।

भैनु दा इक्कला वीर हा आ’ऊं
बुड्ढे मां-प्यो दी जागीर हा आ’ऊं
बंदूकै नै ब्याह् कराई चलेआं
आ’ऊं अपना फर्ज नभाई चलेआं
जिंद देसै दे कम्म लाई चलेआं
आ’ऊं अपना फर्ज नभाई चलेआं।

LEAVE A REPLY

Please enter your comment!
Please enter your name here