मेरे दोस्त
तूं पेदा हा मृत्यु-शैया उप्पर,
अपने हत्थें च लेई लेआ हा तूं मेरा हत्थ,
तेरे हत्थें च में महसूस कीती ही
मौत दी ठंडक
तूं डबलोई दी अक्खें
बड़े हिरखै कन्नै
ते पूरे जोरै कन्नै
लाई लेआ हा मेरा हत्थ
अपनी छाती कन्नै,
उस जोरै कन्नै
जेह्ड़ा
अजें बचे दा हा तेरे च
जीवन दी रैंह्द-खैंह्द दे तौरा पर
शायद तुगी लब्भा दी ही
मूंह् बाकियै खड़ोती दी मौत
तुगी निङलने गी तेआर
ते में अजें मौत दी पौंह्च थमां बाह्र हा
अजें जिंदगी मेरे कन्नै ही
असल च
तूं मिगी नेईं
उस ज़िंदगी गी थ’म्मने-पगड़ने दा जतन करा दा हा
जेह्ड़ी छुड़कदी जा करदी ही तेरे हत्थें चा ।
