अजें भुल्लन गै लगा हा अपनी पीड़ें गी अ’ऊं
ओह्दे साहीं नुहार कोई फ्ही कुतै मिली गेई
फ्ही मुड़ी मोही लेआ खिड़खिड़ हास्से ने
भुब्बलै च फ्ही मुड़ी अग्ग जन बली पेई ।
किन्नियें दलीलें इस दिलै गी समझाया हा
किन्ने जोरें-जबरें ने असें उ'नेंगी भलाया हा
रोई-रोई अक्खियें दे अत्थरूं बी सुक्की गे
केह्ड़े-केह्ड़े लारे कन्नै जी पतेआया हा
अजें भुल्लन गै लगा हा उ'नें सगंधियें गी अ’ऊं
मैह्कें दी भरोची फ्ही ब्हा कुतै चली पेई
अजें भुल्लन गै लगा हा अपनी पीड़ें गी अ’ऊं ।
जोगियें दा बान्ना असें जदूं हा पाई लेआ
कन्न हे फड़ाए, ठूठा, हत्थें हा फड़ाई लेआ
अंग भबूती लाइयै धूना हा रमाई लेआ
सोचदे हे ओह्दा हर ख्याल हा भलाई लेआ
अजें भुल्लन गै लगा हा अपने आपै गी अ’ऊं
पजेबें दी छनकार कोई फ्ही कुतें बज्जी पेई
अजें भुल्लन गै लगा हा अपनी पीड़ें गी अ’ऊं।
उ'ऐ रंग, उ'ऐ तिल ठुड्डी उप्पर ऐ सोब्भै दा
नैनें दा तीर उ'ऐ दिलै च किश खोब्भै दा
उ’ऐ मिठ्ठी जेही बाज रस जन ऐ घोलदी
उ’ऐ त्रिक्खी जेही अक्ख खौरै केह् तफोलदी
अजें भुल्लन गै लगा हा उ'नें अक्खें गी अ’ऊं
नशीली जेही अक्ख कोई अक्खें कन्नै मिली गेई
अजें भुल्लन गै लगा हा अपनी पीड़ें गी अ’ऊं।
उ’ऐ टीस फ्ही मुड़ी मनै च ऐ जागै दी
उ'ऐ धुन बज्जी पेई मुड़ी प्रीत- रागै दी
बंजर जमीनें च औंकर जन फुट्टै दे
उस्सरै दी जिंद फ्ही हांबी पेई गासै गी
अजें भुल्लन गै लगा हा उ'नें डोआरियें गी अ’ऊं
गुड्डी बुत्त होन लग्गी, ब्हा किश चली पेई
अजें भुल्लन गै लगा हा अपनी पीड़ें गी अ’ऊं।
चलेआ निं जोर दिल ऐह्में मुड़ी डु’ल्ली गेआ
केह् किश निं हा होआ, पलें च भुल्ली गेआ
मन-पटारू बड़ा सांभी-सांभी रक्खेआ हा
दिक्खी ओह् मूरत, भेत सारा खु’ल्ली गेआ
अजें भुल्लन गै लगा हा उ'नें वादें गी अ’ऊं
गल्ल सत्तें जरमें दी फ्ही मुड़ी चली पेई
अजें भुल्लन गै लगा हा अपनी पीड़ें गी अ’ऊं।
करां केह् उपाऽ रब्बा उ' नें गी भलाने दा
में ते हा नभाया वादा हिरख नभाने दा
अद्धी बत्ता छड्डी गेआ थां-थां रुलने गी
फ्ही केह् कसूर मेरा मुड़ी दिल लाने दा
अजें भुल्लन गै लगा हा उ'नें ज़ख्में गी अ’ऊं
बनी गेई मैह्रम कोई, साढ़े उप्पर डु’ल्ली गेई
अजें भुल्लन गै लगा हा अपनी पीड़ें गी अ’ऊं ।
