बड़ा कमाया भुक्ख निं चुक्की, भाव अजें बी भुड़कै दे
बूह्टा सुक्कने पर बी टाह्ल्ले मनशा दे निं मुढ़कै दे।
खुदगर्जी दे बा-बलूह्ने थ’म्मे नेईं थम्होंदे न
बिरथा नाच नचांदे रौंह्दे, केईं सोच बेफौंदे न
थ्होने दी संतुश्टी नेइयों, घाटे म्हेशा खुड़ै दे
बूह्टा सुक्कने पर बी टाह्ल्ले मनशा दे निं मुढ़कै दे।
आई खड़ोते लोक चरस्तै, अगला रास्ता सुझदा निं
गिनतरियें सब पेदे जोके, कोई मंजल पर पुजदा निं
माह्नू दी एह् हालत दिक्खी कर्म नुआढ़े गुढ़कै दे
बूह्टा सुक्कने पर बी टाह्ल्ले मनशा दे निं मुढ़कै दे।
सिद्धे-पुट्ठे हर्बे बरती लैती शान बनाई असें
कुसै कम्म निं औनी जेह्ड़ी, कीती असें कमाई असें
असली नेक कमाइयें आह्ले सारे कम्म न छुड़कै दे
बूह्टा सुक्कने पर बी टाह्ल्ले मनशा दे निं मुढ़कै दे।
सब रस्ते अज्ज भुल्ली गेदे, पैर चकोंदे सेधा निं
छुड़की-छुड़ी जान लगामां, काबू मनै पर रेह् दा निं
मूंह्-जोर इस मनै दे घोड़े, केसर हुन बी बुढ़कै दे
बूह्टा सुक्कने पर बी टाह्ल्ले मनशा दे निं मुढ़कै दे।
