ओह् दोस्त बनी मेरे कन्नै, ऐसी बदनीती करी गेआ
विश्वास जो मेरे अंदर हा, ओह् छड़की-छड़की मरी गेआ ।
जिसलै मिलेआ ओह् मते चिरें, मिलदे गै मौसम बदली गे
आपूं ते सावन होएआ गै, किश मी बी भादों करी गेआ ।
हिरखै दा चलन नराला ते, हिरखै दी रीत बी नोखी जे
जो तरी गेआ ओह् रुढ़ी गेआ, जो रुढ़ी गेआ ओह् तरी गेआ ।
जिन्ना चिर मेरे कन्नै हा, मी छोह्न निं दित्ता मेरे नै
फ्ही जान लगा ते बल्लै जेही, मिगी मेरै ब्हाल्लै करी गेआ ।
दुनिया दी हर इक पीड़ा शा मारू ऐ पीड़ बछोड़े दी
ओह् सत्त समुंदर तरी गेआ, जो दर्द-बछोड़ा जरी गेआ ।
रिश्ते ने कि'यां जीना हा, ओह् मरी गेआ उसलै, जिसलै
किश तेरे अंदर मरी गेआ, किश मेरे अंदर मरी गेआ ।
ओह्दे शा चंगा कु'न "साजन", ओह्दे शा बड्डा दानी कु'न
दो मिठ्ठे बोल्लें कन्नै जो सारें दी झोली भरी गेआ ।
