की रोका ना, की टोका ना, जो बोला नां बोलन दे
मेरी जीभा खाम चढ़ी दी, तोला-मासा घोलन दे।
तेरी पींह्गें फर्द कटाई ले हर टीह्सी, हर पुंबली दे
मेरी पींह्ग बी चाढ़ लोआरै, मी बी जिगरा तोलन दे।
जिद्दत दी इस मंडी अंदर हड्ड-नकारे बिकदे नेईं
जां हड्डें गी कारी ला हां, जां हड्डें गी ठोलन दे।
जेह्की हट्टी सुखने बिकदे, हिरदे ,रीझां तांह्गां बी
हिरख-बजारै मी बी, अड़ेआ, ओह्की हट्टी खोह्लन दे।
इक रढ़ै तां लक्खां जम्मन, एह् पीड़ें दी फितरत ऐ
तूं अक्खें गी तोपा-तोपा करियै पीड़ां डोह्लन दे।
जींदा हा तां ठंड कलेजै उसने पाना गाखी नेईं
हुन मढ़ियै पर उसगी बेहियै रज्जी पक्खी झोलन दे।
जाड़-जुआड़ैं, नगरी-बस्ती, कण-कण सूरज करना में
तूं सूरज गी इक्क दुआरी मेरे पासै खोह्लन दे।
