नकली फुल्लेंइ कशबो दा वरदान देऐ
रुलदे पलदे गी बी ओ पन्छान देऐ।
ताकै पेदे म्हत्ता उ’दी निं जानै कोई
दिया बलियै न्हेरें इच पन्छान देऐ ।
जीनै गित्तै सारे रस्ते बंद करैग
फ्ही की लम्मी आयू दा वरदान देऐ ?
अक्खीं केह् जो पान गमें पर पड़दे नेईं
चेह्रा केह् ओह् जेह्ड़ा नेईं मुसकान देऐ ।
इक बी गल्ल खचाऽ दी तेरै इच नेईं
तेरै उप्पर फ्ही कोई की जान देऐ !
कैसा चारागर ऐ चारा करदा नेईं
पीड़ सम्हाली रक्खने दा वरदान देऐ ।
कपट कमाऽ तां लग्गन निं देऐ भिस्क कुसैइ
शैल ढंडोरा पिट्टै जद बी दान देऐ ।
फ्ही किछ दूरी रक्खना लाज़िम होइ जंदा
जिस बेल्लै बी नेड़ मता नुक्सान देऐ ।
दिल गी आप सम्हाली लैङ औं करी सबील
"अम्बर" आख उसी मी ओह् अरमान देऐ ।
