शैह्र मिरे जो होंदे पंगे, बेचन आयां
किश इक रौला, किश इक दंगे बेचन आयां ।
रंगें चाढ़ा रोज़ मर्हक्खे बदली-बदली
चेह्रे होई गे सब बद-रंगे, बेचन आयां ।
पैह्लें शैल नुहारें गी में बेची खाद्धा
हुन मढ़ियें पर शीशे-कंघे बेचन आयां ।
शब्दें दे सब लाबे मेरी भुक्ख चरी गेई
अर्थ बचे दे हे किश नंगे, बेचन आयां ।
न्हेर-बजारै तांह्गें दी इक शम्मा बाली
सुखने दे दो-चार पतंगे बेचन आयां ।
जो जिस्में दी कंधें पर गै रेह् पलमोंदे
में सारे ओह् यार लफंगे बेचन आयां ।
बिजन 'बगान्ना' तेरे कुस हे जाम पलाने
में गज़लें दे सुक्के संघे बेचन आयां ।
