जदूं दे तुस बनी बैठे ओ भाईवाल अक्खें दे
दिलै दी हट्ट अक्खें दी ते हिरखी माल अक्खें दे ।
तुसेंगी डीकना जिसलै, मिगी इ’यां बझोंदा जे
समूचा दिन बी अक्खें दा ते म्हीने- साल अक्खें दे ।
उ’नेंगी रास आया ऐ नमां दाना, नमां पानी
ते शैह्रो-शैह्र चर्चे न मेरी बदहाल अक्खें दे ।
मेरे कन्नें च बाले, घुंघरू पैरैं जि’नें पाए
ओह् मिठ्ठे सुर बी अक्खें दे, फड़कदे ताल अक्खें दे ।
एह् छौरे जिसलै ढलदे न ते ऐसी मार करदे न
जतांह् दिक्खो तोआंह् लभदे बपारी लाल अक्खें दे ।
दोआs-दारू नेईं करेओ उ’नेंगी सद्दी आह्न्नो बस
असेंगी सप्प निं पुड़ेआ, जी, अस आं घाsल अक्खें दे ।
की जोगी डरदे मारे बस्तिया दा रुख नेईं करदा
पता उसगी बिछे दे गैह्ली -गैह्ली जाल अक्खें दे ।
जि’दे नै प्यार सच्चा ऐ, जि’दे नै प्रीत गूढ़ी ऐ
पताला खिच्चियै आह्नन उस्सी भुंचाल अक्खें दे ।
