केईं अनलिखत कविताएं दी गिरफ्त च आं में सालम !
मेरा पूरा बजूद उ'नेंगी अपने अंदर छपैली रखदा,
जि'यां गालढ़-चूहा
छपैलदा खाने आह्लिया वस्तां ।
केईं कवितां ते अत्त शरमौकल
जरा बी सूह् नेईं कड्ढन
अपने भेतें गी कलावै भरी मौज च रौंह्दियां
ते गैबी इल्म आंह्गर मेरी रूह् दा शंगार ।
केईं मेरी सोह्ल-कुंगली सोच दे अंगन करदियां तांडव
जिसलै यथार्थ दे कठोर अनुभवै कन्नै छ्होंदियां
पर निं कूंदियां
शब्दें च ढलदे भावें दा
आनंद ते विस्मय मेरे लेई मृगी कस्तूरी
कुसै घमेआरै दे चज्जल हत्थें आंह्गर
मिगी बन-सबन्ने रूपें च घड़़दियां अंदरो-अंदर।
केईं
सुरमे सलाइयैं मेरी रन्हाकी अक्खीं सजान
जिसलै मौसमी चलाकियां चट्टी जंदियां
मेरी रूह् दी मखीरी मठास
मिगी पसिंद ऐ इं'दी गरिफ्त च रौह्ना
जि'यां पिंजरे च गिज्झे दा तोता ।
