घराटिया

में घराटिया,
दूर डंडकारै च
कुसै नाड़ू दे बन्नै
तांह्‌गें हीखियें कन्नै
पींह्‌दा रौह्‌न्नां पीह्‌न
कदें दरड़ा
कदें म्हीन।

पीड़ें दी रवान्नी नै
अत्थरुएं दे पानी नै
गरड़ घमकदा,
मिगी बी घमकांदा
अपनी टोरै 
मिगी बी चलांदा।

चिंता-झूरें दा
मुट्ठी -मुट्ठी गाला
पीह् दिंदा मेरी मीदें दा
कदें आटा
कदें मैदा
कदें दाला।

आंदरें च अंदरो-अंदरी
ऐसी सलगदी
ऐही बलदी
धुखदा रौंह्‌दा,
नि'म्मा-निग्घा धखाड़ा।

सूंक सु'ट्टी सोचन्नां
जालो-खालें दी 
डग्गी दा भार
कदूं तगर ढोना
चक्की दे द'ऊं पुड़ें च
अ'ऊं कदूं तगर प्होना?