चढ़ी जोआनी ठंडु गी, नेइयों एह् थम्हांदी
हर माह्नू ते पक्खरुएं गी ठुर-ठुर एह् करांदी
हिरखै चमकै लिब्बड़ें कन्नै अपना जाल बछाई
डबल नमूनिया, छाती चमकी, छुड़दी एह् कराई
आखरले पैह्र कुक्कड़-बांगा कोरा सु’ट्टी टकांदी
हर माह्नू ते पक्खरुएं गी ठुर-ठुर एह् करांदी
चढ़ी जोआनी ठंडु गी, नेइयों एह् थम्हांदी।
उच्चियें धारैं बर्फ सु’ट्टियै करदी एह् गोआली
नेईं थम्हांदी फिरने कोला, चढ़दी आई मोहाली
चादर, कंबल कोई पलेटी ब’वै बिच पसार
अंदर बड़ियै चुब्भां करांदी, बैरी एह्दी सार
जे ञ्याणें खेढन बाह्र, मता एह् सतांदी
हर माह्नू ते पक्खरुएं गी ठुर-ठुर एह् करांदी
चढ़ी जोआनी ठंडु गी, नेइयों एह् थम्हांदी ।
इस्सी शर्म बिंद निं, यारो, घेरे दा हर माह्नू
जि’यां-जि’यां दिन घरोंदा बनदी बेपन्छानू
लेई रजाई राती सौचै, बैरी दुक्खैं सड़दी
कंढा जरा बी उच्चा रेही जाs, सूंकां मारी बड़दी
बिच्च बढ़ापै अड्डै चढ़ी जाs, सिद्धे लम्मा पांदी
हर माह्नू ते पक्खरुएं गी ठुर-ठुर एह् करांदी ।
चढ़ी जोआनी ठंडु गी, नेइयों एह् थम्हांदी
अग्गी सेकैं बेहियै ‘कुंडरियै’ तरलैं जान बचाई
पैर पुआने, औंगलियां सेकी मुशकलैं होश आई
बदनाम होआ सेआल बचारा, एह् करदी आई खार
ओ दुक्खैं सड़दी, सीत खलारी रज्जी करै शकार
मुंगफली ते गजक, रेओड़ी फटो-फट खलांदी
हर माह्नू ते पक्खरुएं गी ठुर-ठुर एह् करांदी
चढ़ी जोआनी ठंडु गी, नेइयों एह् थम्हांदी ।
