उच्चियां भाखां,रंगले भेस
धारें बसदा डुग्गर देस।
इस देसै दी मिट्ठड़ी बोल्ली
अंबै कन्नै मिशरी घोली।
सुनियै जिसगी जा कलेश
उच्चियां भाखां,रंगले भेस
धारें बसदा डुग्गर देस।
चढ़दा सूरज मत्था टेकै
त’वियै कन्नै हसदा खेढै
काली धोंदी जित्थै केस
उच्चियां भाखां,रंगले भेस
धारें बसदा डुग्गर देस।
रौंगली ब्हारै उच्चड़े प्हाड़ै
फु’म्मनी लब्भै थाह्रै-थाह्रै
गोरी नच्चै पाई पलेस
उच्चियां भाखां,रंगले भेस
धारें बसदा डुग्गर देस।
गर्भै अंदर देवी बसाई
प्हाड़ बैठे इत्थै पैह्रा लाई
कुदरत बैठी पाइयै खेस
उच्चियां भाखां,रंगले भेस
धारें बसदा डुग्गर देस।
छल्ल चन्हा दे मीत मलांदे
सोह्नी बीती गीत सनांदे
बगदे नाड़ू रेसो-रेस
उच्चियां भाखां,रंगले भेस
धारें बसदा डुग्गर देस।
कंढियै ढक्कियै चढ़दी नार
रखदी राखी अंदर-बाह्र
बर्तें-नत्तें भरी बरेस
उच्चियां भाखां,रंगले भेस
धारें बसदा डुग्गर देस।
मिट्टी इसदी राग सनांदी
वीरें दी एह् गाथा गांदी
जित्तो-डीडो दा एह् देस
उच्चियां भाखां,रंगले भेस
धारें बसदा डुग्गर देस।
