कु’त्थुआं दा चली संस्था कु’त्थूं धोड़ी आई ऐ
तुसेंई केह् सनांऽ में, संस्था आपूं गै गुआही ऐ ।
सोलां आन्ने स्हेई यारो गल्ल ऐ स्यानें दी
कम्म आपूं बोलदा ऐ लोड़ नेईं सनाने दी
संस्था नेईं रचै कोई साहित्य ते रचोंदा ऐ
संस्थाएं दा छड़ा प्रोत्साहन गै होंदा ऐ
दिक्खो यारो संस्था ने व्यवस्था जो बनाई ऐ
कु’त्थुआं दा चली संस्था कु’त्थूं धोड़ी आई ऐ ।
अगुआ जिस संस्था च ऐ सुलझे दा सिरमौर
करोना च बी की निं चलै गोश्ठियें दा दौर
संस्था ओह् खुआंदी जो व्यवस्था बनांदी ऐ
साहित्य नै जुड़े दे सारे कम्म बी करांदी ऐ
व्यवस्था ने गै शक्ति बी साढ़ी बधाई ऐ
कु’त्थुआं दा चली संस्था कु’त्थूं धोड़ी आई ऐ ।
संस्था दा कम्म ते साहित्य गी बधाना ऐ
सरबंधत गतिविधियें गी चार चन्न लाना ऐ
ओह्दे च फ्ही किन्नी यारो रेही कामयाब ऐ
दस्सने दी लोड़ नेईं खु'ल्ली एह् कताब ऐ ।
सारें दे जो सामनै ओह् गल्ल में सनाई ऐ
कु’त्थुआं दा चली संस्था कु’त्थूं धोड़ी आई ऐ ।
जिस्सी नेईं यकीन, झूठे लग्गन मेरे बोल
भवनै च दाखल होई दिक्खी लै सारा म्हौल
अपने मुहां गाथा में कैह्सी गानी ऐ
मुंढले साहित्यकारें मौन रेही सनानी ऐ
शारें-शारें जेह्ड़ी कत्थ तुसेंई में सनाई ऐ
कु’त्थुआं दा चली संस्था कु’त्थूं धोड़ी आई ऐ ।
विकास आह्ली गतिविधि लगातार ऐ चलै दी
भवनै दे मंदरै साहित्य-जोत ऐ बलै दी
जि'यां-जि'यां सुखने होंदे रौह्ङन फ्ही साकार
बधदा जाह्ग संस्था दा बी हार ते शंगार
होंदी रौह्नी दिन-दिन जोत बी सुआई ऐ
कु’त्थुआं दा चली संस्था कु’त्थूं धोड़ी आई ऐ ।
कुंवर वियोगी हाल उच्चा होइयै बोल्लै दा
झंडा कामयाबी आह्ला संस्था दा झोल्लै दा
जनता ते मदाद गित्तै झट ऐ यारो दौड़दी
अगुए च होनी फ्ही समर्था छड़ी लोड़दी
असली एह् कत्थ सारी तुसेंई में सनाई ऐ
कु’त्थुआं दा चली संस्था कु’त्थूं धोड़ी आई ऐ ।
नित्त नमें सुखने जे संस्था लैंदी रौह्ग
बदलोंदे समें नै ताल-मेल बनेआ रौह्ग
जो संस्था दा ऐ सामनै ओह् रूप स्थूल ऐ
लब्भै दा निं जेह्ड़ा, ओह् कारण ते मूल ऐ
संस्था गेई कारण ते कारज नभाई ऐ
कु’त्थुआं दा चली संस्था कु’त्थूं धोड़ी आई ऐ ।
शिक्षा राहें लखारियें दा परिचे करवाया ऐ
बैंक दे कलंडरें राहें हर थां पजाया ऐ ।
गल्ल नेईं कोई छोड़ी प्रचार- प्रसार दी
अग्गै-अग्गै दिक्खो संस्था केह्ड़ा रूप धारदी
विकास कम्में आह्ली गड्डी वाह्-वाह् चलाई ऐ
कु’त्थुआं दा चली संस्था कु’त्थूं धोड़ी आई ऐ ।
हत्थै बिच हत्थ पाई जंजीर जन होंदे जाओ
त्रोड़ी सकै नेईं कोई, कड़ियां परोंदे जाओ
विकास ते प्रचार आह्ले कम्में लग्गी रौह्ना ऐ
जिन्ने चिर ऐ साह् सत जिंदू च, निं बौह्ना ऐ
पंदरा रोजा गोश्ठियां तुस रक्खो घमकाइयै
कु’त्थुआं दा चली संस्था कु’त्थूं धोड़ी आई ऐ ।
केह् होर अग्गै होग, साफ उज्जल भविक्ख ऐ
कीजे संस्था दा सदस्य हर सवा लक्ख इक ऐ
लब्भेआ निं मी कोई बी कम्मै शा जो नस्सेआ
जिस्सी बी प्रधान होरें कम्म होऐ दस्सेआ
व्यवस्था गै ऐसी किश उ’नें फ्ही बनाई ऐ
कु’त्थुआं दा चली संस्था कु’त्थूं धोड़ी आई ऐ ।
