शब्द- निर्माण वर्कशॉप—
ध्यान चफेरे दा अज्ज ढाइयै
गल्ल सुनो तुस मन चित लाइयै
कविता नेईं ऐ एह् ऐ घटना
काव्यमयी एह् नां कोई रचना
गल्ल सनाङ में देई प्रमाण
क्हानी जेह्ड़ी हुन लगेआं सनान
गल्ल निं कोला करङ बनाइयै
गल्ल सुनो तुस मन चित लाइयै।
ट्रिपल आई एम दा सज्जनो सैल्ल
पैह्लें हा जेह्ड़ा आर. आर. ऐल्ल
कराई उत्थै कुसै ने वर्कशॉप
प्रसंग इक चलेआ अपने-आप
सुनो हुन की में गल्ल चलाई ऐ
गल्ल सुनो तुस मन चित लाइयै ।
विशे हा डोगरी-शब्द-निर्माण
खेत्तर तकनीक ते कन्नै विज्ञान
सज्जन हे जिन्ने बी उत्थै प्रैजैंट
में बी हा उं’दे बिच पार्टिस्पैंट
सुनो मुसीबत केह् बनी आई ऐ
गल्ल सुनो तुस मन चित लाइयै।
द'ऊं शब्दें पर बैह्स छिड़ी पेई
खिच्च-म-खिच्ची होन लगी पेई
शब्द हे सज्जनो दोऐ टैकनिकल
इक हॉरिजैंटल दूआ वर्टिकल
सभा च सभनें फ्ही धुम्म मचाई ऐ
गल्ल सुनो तुस मन चित लाइयै ।
हॉरिजैंटल घड़ोई गेआ सौखा
लग्गै दा हा वर्टिकल बिंद औखा
मंच मगोत्रा साह्ब ने फड़ेआ
झट खड़ुत्तमा शब्द इ'नें घड़ेआ
सभनें दे चेह्रै रौनक आई ऐ
गल्ल सुनो तुस मन चित लाइयै।
सज्जन इक सज्जनो बिचा उट्ठेआ
मिलदा-जुलदा शब्द कड्ढी सुट्टेआ
खबरै केह् सुज्झी ओह्दे मनै च खुत्त
बोल्लेआ होई सकदा निं शब्द खड़ुत्त
इ'नें फ्ही जेह्ड़ी गल्ल गलाई ऐ
गल्ल सुनो तुस मन चित लाइयै।
खड़ुत्त निं होंदा बेही जा सज्जना
समां हुन तुगी समझांदे लग्गना
सुनदे सार ओह् झट बेही गेआ
दुएं दा बी जिगरा ढेई गेआ
खबरै समझ आई निं आई ऐ
गल्ल सुनो तुस मन चित लाइयै।
जे आक्खो अर्थ में हुन समझाना
अपने स्हाबें तुसें ई सनाना
खड़ुत्त ऐ जित्थुआं हलचल नस्सै
खड़ुत्तमा ओह्दी स्थिति गी दस्सै
बिन बोल्ले जो इ'नें समझाई ऐ
गल्ल सुनो तुस मन चित लाइयै।
अर्थ भेद बिंद करी निं सकना
सूखमताएं गी फड़ी निं सकना
छड़ा लखारी बनियै नच्चना
कविताएं दी वाह् वाह् पर हस्सना
छड़ी इस बिच नेईं बड़ेआई ऐ
गल्ल सुनो तुस मन चित लाइयै।
विद्वता ऐ सज्जनो जिसदे कन्नै
लेखन बी जेह्दा हर कोई मन्नै
हिरदे देऐ मेरा ओह्दै दस्तक
म्हेशां चरणें होई नत्मस्तक
होई गेआ एह् मन शदाई ऐ
गल्ल सुनो तुस मन चित लाइयै।
अ'न्ने-बौरे आं अस सब डौर-भौर
खबरै की आं फ्ही होए दे बतौड़
होऐ जेह्दी गल्लै च म्हेशां गल्ल
समझो उसगी ओह् नेईं ऐ लल्ल
में ऐह्में नीं गल्ल एह् चलाई ऐ
गल्ल सुनो तुस मन चित लाइयै।
माह्नू दे बिच फ्ही माह्नू गी दिक्खो
करना मड़ो उसदा मान फ्ही सिक्खो
समां निकले हत्थ दा निं औना
जागो सज्जनो निं पवै पछताना
गल्ल तुसें ई जेह्ड़ी सनाई ऐ
गल्ल सुनो तुस मन चित लाइयै।
लफ्जें दे शारें च सुनो मेरी बाज
रौह्न देओ सज्जनो राज गी राज
शारें-शारें च गल्ल होन देओ
जेह्ड़ा निं समझै उसी रौह्न देओ
केह् करना सभनें ई समझाइयै
गल्ल सुनो तुस मन चित लाइयै।
धरती 'र बिरले गै होंदे इंसान
बिरले गै करदे न उं’दी पंछान
बेशक नीं दुनिया च किसै दी थोड़
पर परखने च पौंदी बुद्धि दी लोड़
गल्ल असली तुसें ई सनाई ऐ
गल्ल सुनो तुस मन चित लाइयै।
————————————
