इ’यां गै निं नींदर मेरी त्रुट्टी जंदी ऐ
इक चिंड जेही दिलै च उठदी रौंह्दी ऐ
इस दुआसी दा सबब में केह् दस्सां
अक्ख इ’यां गै मेरी सेजली जंदी ऐ
फ्ही कुसै ने 'जान' आखियै बलाया होना
ओह् जरूर मेरे दरोआजे तक आया होना ।
किश ते है पर लगदा ऐ किश बी नेईं
दिल मयूस है, पर लगदा ऐ है बी नेईं
फ्ही बी एह् साह् मेरे उखड़ी की जंदे न
ते मेरे बोल, मेरे होंठ कंबी की जंदे न
बशक कोई पीऐ लड़खड़ाया होना
ओह् जरूर मेरे दरोआजे तक आया होना ।
सब किश खमोश ते कोई बाज निं कुतै
फ्ही बी इ’यां बझोंदा कोई इत्थै गै कुतै
उ’आं ते ऐसी कोई नोखी गल्ल बी नेईं
होआ करदी ऐ ठक जेही बाज ऐ कुतै
उन दर मेरा खटखटाया होना
ओह् जरूर मेरे दरोआजे तक आया होना ।
दिक्खियै बंद घरै दी सौंगलें गी
बेवफा उन मिगी गलाया होना
ओह् त्रुट्टे दा बड़ा गै होना फ्ही बी
नांs मेरा गै ओह्दे बुल्लें पर आया होना
जां ड्योढी पर मेरे घरै दी
उन सिर अपना झकाया होना
फ्ही रली गेआ होना फकीरें च
में गै निं भुल्ली सकी उसगी
ओह् बी कु’त्थै मिगी भुल्ली पाया होना
ओह् जरूर मेरे दरोआजे तक आया होना ।
