भामें झड़ी होंदी, भामें निंबल
भामें बरखा कन्नै टल्लु तरपिन्न
भामें चित्त डूंह्गी सोचें पेदा होंदा, भामें खिन्न
बड़े दूरा दा चलियै औंदी ही ओह्
पर आह्नदी रोज ही ओह्
परोला, सुक्के दे बैर, फकोआड़े ते त्रिंबल
अपने आपै कन्नै गल्लां करदी
कदें हसदी ते कदें अक्खी राहें ब’रदी
धन अक्खीं निं हा दिक्खेआ
पर उसदा नांs हा -–धनपतू ।
खुशी बचारी ने दिक्खी गै कदूं
उसदा घरैआह्ला ते दो गिल्लू मरी गेदे हे
ते उस्सी सदमे कन्नै अद्धमोई करी गेदे हे
जिसलै बी ओह् औंदी चुक्कियै दो बुछकड़ियां
तां ञ्याणें दा मन लैन लगदा हुशकड़ियां
सोहा होंदा जां स्याला
रोज गै सनोचदा हा उसदा आला
इक बुछकड़ी कालजै नै लाई, दूई भुञां टकाई
गल्लां करदे-करदे ओह् बेही जंदी ही
ते साढ़े अंदर आइयै द’ऊं फुलके रोज खंदी ही
“बुआ, मिगी अंबला दे, कल्ल बसोआ ऐ
कल्ल में खमीरे बनाने न, अपने घरैआह्ले गी खलाने न
कल्ल मेरे गिल्लुऐं औना ऐ, मेरे कोल आइयै बौह्ना ऐ ।”
अस निक्के ञ्याणे उसदे आलै-दोआलै किट्ठे होई बौंह्दे हे
जिसलै ओह् एह् जनेहियां गल्लां करदी, अस लिब्बड़ु कड्ढियै रोंदे हे ।
उस्सी जेकर कोई पैसे दिंदा तां ओह् आखदी ही
“रौह्न दे, बुआ, में पैसे केह् करने न
मेरे पचोआड़ बड़े कैंबलु ते ग’रने न
में छड़ी रुट्टी खानी ऐ ।”
ओह् दो फुलके खंदी ही, दो जागतें लेई लीरै च ब’नदी
“भला होऐ, भला होऐ ।” आखदी ते फुलके सौ-सौ- बारी बंददी
जिस बुछकड़ी च उसने जागतें दे टल्लु रक्खे दे होंदे
उस बुछकड़ी दा ओह् बसाह् निं ही खंदी
कलेजै कन्नै गै लाई रखदी ही
मोई जित्थै बी जंदी ही
सिर्फ द’ऊं टिगड़ें दी खातर
केईं क्रोह् पैंडा तैs करियै औंदी ही, धनपतू
साढ़े घर आइयै, देसी चाह् पींदी ते बिंद बसोंदी ही, धनपतू
धनै दी मोह्-माया शा दूर, भलेआं दूर
इस ढिड्डै दी खातर, हुट्टी-हुट्टी होई गेदी ही चूर
विरक्ति दी ओह् मूरत
त्रिक्खे नैन-नक्श ते सन्हाकड़ी सूरत
सच्ची-सुच्ची भावना
सिर्फ साहें दा साथ नभाने लेई साधना
दुनिया च रेहियै, मोह्-माया शा दूर
भामें कड़कदी धुप्प होऐ बा पुज्जना जरूर
असेंगी किन्ना किश सखाई गेई ही धनपतू
खीर इक दिन मौती दी गोदा च समाई गेई ही धनपतू ।
