घाली—
मेरा मसां-घाली हिरख
तुगी रास निं आया
तूं मेरे ने अत्त कीती
तुगी दनां क्यास नी आया
वक्त ने ऐसा पासा फ्ही परतेआ
तेरे सारे मरक्खे उतरी गे
जिन्नै बी लब्भदे साफ लाब्बे हे
सारे दे सारे कुतरी गे।
ऐसा सप्प डंगेआ असेंगी
ऐसी न्हेरी आई
ऐसा दिन चढ़ेआ साढ़ा
तड़फो-तड़फी पाई
अंदर ही मैल उं’दे
असेंगी कोड़ी कोड़ी खादा
अपने कर्म आए साढ़े अपने गै अग्गै
अपना मनसे दा जि’यां अप्पूं गै खादा।
बैत्तल होई जिंदगी ते फिरै लूरो-लूर
लब्भी निं बत्त कोई
होए जीने शा बी दूर
तूस-तूस मची दी हून
अंदर गै मेरे
तोपा नेई लब्भदी लोई
छड़े न्हेरे गै न्हेरे।
गास बी हस्सदा हून उप्पर गै साढ़े
केह् होई जंदा हाल
जिसलै दिन आंह्दे माड़े
सोचेआ इक हल्ल
नेईं कीती कुसै नै गल्ल।
दिलै दी बाड़िया लग्गे दा बूह्टा
असें फ्ही पुट्टी टकाया
कीता मोख ते लाए कन्न हत्थ
सब किश तविया परबाया।
--------------------------
