केह् पता हा ऐसी सरञ घरोनी, ऐसा दिन आई जाना
अंबड़ी ने रुस्सी जाना, असें मां-म्हेटर होई जाना ।
आखदे, ओह् मत्थे उप्पर काला टिक्का लांदी ही
बालें गी हत्थ फेरी-फेरी कुंडल जन जी पांदी ही
करूतनी दी घैंटी अजें बी मेरे कन्नें च ऐ खनकदी
जनम-दिनें उप्पर, खम्मनी गी गंढ ओह् लांदी ही
बाबे बालक नाथै गी मां बड़ा गै मनदी ही ।
उसदे हिरदै च भक्ति दी जोत सदा गै बलदी ही
साढ़े सुख-चैने लेई, किन्नियां सुक्खनां करदी ही
तबीज पोआंदी, सैंती स’रेआं, काला धागा ब’नदी ही
केह् पता हा इन्नी तौले रिश्तें दा धागा त्रुट्टी जाना
अंबड़ी ने रुस्सी जाना, असें मां-म्हेटर होई जाना।
दूआ दुद्ध-मलाई दा बड़ा गै लोभी शौंकी हा
चोरिया हा खाई जंदा, मां बड़ा गै खिंझदी ही
मंझला बड़ा गै टूटी हा, बड़ी गै फैंटी पौंदी ही
कन्नै किश भखौला हा, भुक्ख मती गै लगदी ही
रोह् मां गी चढ़ी हा जंदा, कसर कदें निं लगदी ही
अंदरों करदी लाड मता, मुहां सिफ्त निं करदी ही
फुल्के इसदे निं गिनेआं लाड़ी, इ'यै अरज करदी ही
उ' न्न जोआना ने बी मां दी बड़ी गै सेवा कीती
जे निं होंदा मंझला, मां मता चिर निं बचदी ही
निक्का मता गै निक्का, मां दी अक्खें दा तारा हा
जमदे भांए दूर होई गेआ, में केह्ड़ा दप्यारा हा
केह् पता हा भलेआं गै ऐ प्यार चकोई जाना
अंबड़ी ने रुस्सी जाना, असें मां-म्हेटर होई जाना ।
अपने स्हाबें घरै च उ'न्न, संतुलन बनाई रक्खेआ हा
रोस्से लक्ख हे भांए, डोरी च परोई रक्खेआ हा
अंबड़ी दे होंदे असेंगी बी, इक बेपरवाही रौंह्दी ही
कुसै गल्लै दी थोड़ नेईं, नां कसर गै कोई होंदी ही
अस बी दाह्वे नै जाई हे बौंह्दे, ओह्दा गै प्यार हा
ओह्दे होंदे उस घरै प, साढ़ा बी किश अधिकार हा
में निं आखदा ओह् कोई, देवी जां भगोआन ही
ओह्दी साढ़े च, साढ़ी ओह्दे च बसदी जान ही
केह् पता हा जान साढ़ी ने, इ'यां छड्डियै जाना
अंबड़ी ने रुस्सी जाना, असें मां-म्हेटर होई जाना।
कदें कदें में ग्रां हा जंदा, चेचा लाड लड़ांदी ही
कढ़े दे दुद्धै दी गलासी, बिच्च मलाई पांदी ही
चेचे चु’ल्ली दे फुल्के बनदे, ते मक्कें चौलें दे ढोडे
घ्यो कन्नै तरबतर, चुप्पड़े दे फुल्के खलांदी ही
जदूं में हासै-हासै आखदा, केहड़ा कमरा मेरा
अपने गै कमरे गी आखदी, इ'यै पुत्तरा तेरा
केह् पता हा उ'ऐ कमरा, सुन्ना जेहा होई जाना
अंबड़ी ने रुस्सी जाना, असें मां-म्हेटर होई जाना।
पता नेईं हुन घरै दे मंदरै च जोत बी बलदी होनी
रमायण, चलीसे, भगवत गीता कु'न हुन पढ़दी होनी
पता नेईं मंदरैं, सत्संगैं, हुन कु' न-कु'न गांदी होनी
कोई बी होऐ मां जनेही, बाज कुसै दी निं होनी
आखदे कुक्ख माऊ दी, इक क्षीरसागर होंदा ऐ
नां फिक्र कोई, नां कम्म कोई, सुरगी नंद होंदा ऐ
अंबड़ी दे होंदे सुरगें दी, खबर कुतै ते रौंह्दी ऐ
जीना भाएं औखा ऐ, इक आस मनै च रौंहदी ऐ ।
हुन बी बापू दा अक्सर, फोन आई गै जंदा ऐ
सबर स्नेहा पुज्जी जंदा, मन भरचाई जंदा ऐ
फ्ही दुआसी छाई जंदी, खाल्लीपन जेहा रौंह्दा ऐ
सैह्बन गै अक्ख भरी जंदी, अंबड़ी दा चेत्ता औंदा ऐ
सैह्बन गै अक्ख भरी जंदी, अंबड़ी दा चेत्ता औंदा ऐ ।
