मेरी माऊ दा किश
अनमुल्ला समान
कदें कुसै गी नी लब्भा
खबरे कुसै ने कदें
तुप्पेआ बी नेई
कुत्थै छपैलियै रक्खदी होग?
अ'ऊं सोचें पेदी
मेरियां बी अपनियां
किन्नियां गै नुक्करां न
घरै अंदर
जि’नें गी कदें
कोई तुप्पी गे नेईं सकदा
ते उ’नें लुप्प नुक्करें च
सांभी रक्खे दा में
मेरा अपना अनमुल्ला
ओह् समान।
मेरे दुख
मेरे अत्थरूं!
मेरे सुखने
मेरियां इच्छां
मेरियां किश सोचां
ते मतेहारे विचार
मेरियां किन्नियां गै
अकांख्या
ते होर बी खबरे
केह् किश।
दोआरी कन्नै चमड़ियै
खलौती दी दराड़े
च किश तुप्पदियां
मेरी माऊं दियां अक्खीं
मिग्गी म्हेशा
गै आखदियां
रौंह्दियां।
जनानी दा किन्ना गै
समान गुज्झा रौंह्दा
जिन्दगी भर घरें दियें
उ’नें लुप्प नुक्करें च
ते चांह्दे होई बी
तुप्पी नीं सकदा
कोई बी
जां फ्ही खबरे कदें
कोई तुप्पना गै नेईं
चांह्दा
खजानें कन्नै भरोची
दियें उ’नें नुक्करें गी
कदें कदें आपूं
जनानी बी नेईं।
————————-
