सफाई—
अपने उप्पर काबू रक्खी गल्ल नुआढ़ी जरी ऐठा
बैर मेरे शा निभेआ निं, में सु’ला-सफाई करी ऐठा ।
अपना पक्ख सनाने दियां में लड़ाइयां केईं सबीलां
नर्मी गी कमजोरी मिथियै सुनियां गै निं उन दलीलां
सच्चो-सच्च में ओह्दे अग्गें दिल खोह्लियै धरी ऐठा
बैर मेरे शा निभेआ निं, में सु’ला-सफाई करी ऐठा ।
गल्ल कुसै गी समझा आई जाऽ, तां गै लाह् समझाने दा
होर मिगी कोई थौह् निं आया बधदी गल्ल मकाने दा
गोते लग्गे नेकां भाएं, खीर में सागर तरी ऐठा
बैर मेरे शा निभेआ निं, में सु’ला-सफाई करी ऐठा ।
मेरा सुआतम ओह्दा रोसा मता हारा परघाली’आ
ओह्दे मनै दी न्हेरी कोठी, खरै कु’न दीआ बाली' आ
ओह् समझियै खुश होई' आ जे अ’ऊं बाजी हरी ऐठा
बैर मेरे शा निभेआ निं, में सु’ला-सफाई करी ऐठा ।
हौले फुल्ल होए मन साढ़े, चिंता-सैंसा दूर होई
ओठें पर मुस्कान छाई ही, खुशी मनैं भरपूर होई
सु’ला होई 'केसर' गी लग्गा, ओह् खजाने भरी ऐठा
बैर मेरे शा निभेआ निं, में सु’ला-सफाई करी ऐठा ।
