अक्खर

अक्खर भाव—

चन्न भाएं
मटमैला पीला
परतेहानी दी गंढु आंह्‌गर, पर
रिश्म-रिश्म कोई भेत गलांदी
सुत्ती दी कोई तांह्‌ग जगांदी।

एह् सज्जनै साहीं दिक्खी मी
मुस्करा ‘रदा
पोपले मुहां आह्‌ली बडेरी आंह्‌गर
सीस दिंदा जा ‘रदा ।

देई चाननियें दा वर
आखा दा—
तूं कविता कर
अक्खर-अक्खर
सक्खर भाव
मनै दे औन
सोचें गी बी ज्हारां रस्ते
उसलै थ्होन ।

कविता दा कोई फुट्टी पौना
झरना दिक्खेआं ।
निक्के-निक्के डुंभें दा तूं
भरना दिक्खेआ ।