अजादी दा एह् पर्व-ध्याड़ा लेइयै आया शान
अज्ज अजादी मुल्ख भरै दी सब्भै लेइयै जान ।
घर-घर सज्जी भरी-भरोची गरदौरी इ’यै लोआनी
हिरखी सोच मनै दी असें रूहें च बसानी
साढ़ी सोच हमेशा चंगी, मिट्ठी खंड जवान
अज्ज अजादी मुल्ख भरै दी सब्भै लेइयै जान ।
कोई मनुक्ख खिल्लरी-खिल्लरी होऐ नेईं दाना-दाना
धरत बी कंबन लगी दिक्खो, रेहा नेईं कोई ठकाना
कलजुगै दे असार न यारो कयामत दी नशानी
रब्ब ने डायरी अंदर लिखी सभनें दी एह् क्हानी
इक दुए दियां दुख-तकलीफां मिलियै सब चकान
अज्ज अजादी मुल्ख भरै दी सब्भै लेइयै जान ।
भैड़ी सोच करियै असें पापी कैह्ली बनना
बुरे कम्मै दी जढ़ घरेड़ी इस बरोधी लड़ना
अमन हमेशा रक्खी, अस करनेआं सब्भै काज
बैरी कदें नेईं बनेआ साढ़ा देसै दा समाज
हिरखी सदा गै रेही ऐ साढ़े मुल्खै दी कमांड
अज्ज अजादी मुल्ख भरै दी सब्भै लेइयै जान ।
बैर-बरोध कदें नेईं कीता, कीता नेईं कदें असें छिन्ना
हिरखै दा असें देई सबूत अमन रक्खेआ किन्ना
अच्छी सोच करियै फ्ही बी मता प्यार जगाना
हर माह्नू गी छाती लाइयै प्यार कन्नै समझाना
सब्भै मिलियै हिरखै कन्नै गीत अमन दे गान
अज्ज अजादी मुल्ख भरै दी सब्भै लेइयै जान ।
झूठी अफवाहें कशा बचना, एह् खढांदियां जड़ियां
बिना मतलबी बैह्स नेईं करनी, बैरी होंदियां अड़ियां
चुक्क बी इं’दी भैन ऐ सक्की, एह् मरोआंदी थांऽ
जिस पास्सै बी फूक मारै, उज्जड़े शैह्र-ग्रांऽ
इ’नें गल्लें गी मिलियै सारे रूहें इच्चा कढान
अज्ज अजादी मुल्ख भरै दी सब्भै लेइयै जान ।
अजादी आखै, इज्जत रक्खनी अपनी किश माढ़ी
फुल्लें आह्ङर हसदी र’वै एह् रियासत साढ़ी
हिरखें विदेशे बंडे जाइयै, डूंह्गे प्यार जगाचै
घेरे सट्टे अमन खलारी सदा गै अस राह्चै
हिरखी बत्त मनै दी सारे रूहें च बसान
फुल्लें आह्ङर खिड़ी-खिड़ी इस बधाई ऐ शान
अज्ज अजादी मुल्ख भरै दी सब्भै लेइयै जान।
अजादी एह् सखांदी भाई, करेओ चंगी सलाह्
रब्ब बी खुश होंदा जे कोई भला करदा जा
नेईं सखांदी कदें बी एह् हिरखी सोच गोआओ
हमेशा गै तुस मिली-जुली खुशियां बंडी जाओ
तां गै इज्जत रौह्नी, फ्ही बनदी ऐ पन्छान
फुल्लें आह्ङर खिड़ी-खिड़ी इस बधाई ऐ शान
अज्ज अजादी मुल्ख भरै दी सब्भै लेइयै जान।
उमेदां रक्खी फ्ही बी बैठे श्हीदे दे परिवार
हीखी लाइयै मनै अंदर औङन सब सुधार
घर-घर जाइयै डोल मनै दी इं’दी असें पुच्छनी
हर मुसीबत बेल्लै जाइयै डग्गी इं’दी चुक्कनी
फ्ही गै पक्के होने साढ़े श्हीदे दे बलिदान
अज्ज अजादी मुल्ख भरै दी सब्भै लेइयै जान ।
एह् फरियाद अजादी माढ़ी पूरे देश पजानी
जिंदगी दिन चार-ध्याड़े छेकड़ मुक्की जानी
जे अजादी बंडी देचै माड़े जीङन सारै
रब्ब बी खुश होंदा जिसलै दुखी गड़ाके मारै
एह् ऐ गीता, बाइबल अंदर, बिच्च लिखेआ कुरान
अज्ज अजादी मुल्ख भरै दी सब्भै लेइयै जान ।
देसै अंदर पुलस-फौजियें, ञ्याणें नंद बनाई
झंडे तरंगें झुल्ली-झुल्ली दित्ती खूब बधाई
अज्ज देआ दी खूब बधाइयां भरी-भरोची सारै
कदें निं होन देगे अस देसै दे बटबारे
मंदर, मस्जिद, गुरुदुआरे, गिरजे दुआऽ करान
अज्ज अजादी मुल्ख भरै दी सब्भै लेइयै जान।
‘कुंडरिया’ गी बी गेरी कन्नै नेईं कराएओ छंदा
अमन आह्ले रस्ते चलचै आखै नेईं कोई मंदा
हिरखै कन्नै भरी-भरोची मिलियै रौह्चै सारे
खुशियां अंदर रुज्झे रौह्चे हिरखी लाई फुहारे
अमन हिरख प्यार बंडै दे झंडे चढ़ी शमान
अज्ज अजादी मुल्ख भरै दी सब्भै लेइयै जान।
अजादी दा एह् पर्व ध्याड़ा लेइयै आया शान
अज्ज अजादी मुल्ख भरै दी सब्भै लेइयै जान ।
