अज्ज ललारिया ओढनी मेरी फोटोदार रंगाई देआं
अजादिया दे उ'नें वीरें दा इक नक्शा बिच बनाई देआं ।
सूत्तर असली भारत दा, बिच्च धागा निं कोई गैर होऐ
इक बनायां बाग तरंगा ते बिच बगदी नैह्र होऐ
बिच्च बैठे चरखा कत्तन बापू गांधी महात्मा
बब्बर दस्सेआं हत्थ तरंगा नेहरू नेह् धरमात्मा
ज्हाज भरे डोब्बे नेतें दे, एह् सारै छपोआई देआं
अज्ज ललारिया ओढनी मेरी फोटोदार रंगाई देआं ।
बिजय लशमी हत्थ झंडा लेई बिपन दे संग जाई घेरै
सरोजनी बुआ दे हत्थ चक्की, भरी जेह्ला बिच्च फेरै
जलियांवाला बाग छापेआं, ल्हु दी खड्ड बगाई देआं
अज्ज ललारिया ओढनी मेरी फोटोदार रंगाई देआं।
कन्नै बनायां चंदर शेखर जी अंग्रेजें कन्नै लड़दे
राजगुरु, सुखदेव, भगत सिंह फांसिया उप्पर चढ़दे
नौ'अखाली ओवलिया बिच बिजली तार कटाई देआं
अज्ज ललारिया ओढ़नी मेरी फोटोदार रंगाई देआं ।
मदन गोपाल दी छातिया दस्सेआं केई निशाने तीरें दे
लाजपत गी डांगां ब’रियां सर,फड़के जि’यां लीरें दे
राम प्रशाद ते दर्शन सिंह अजादिया रंगे रंगोए दे
अशफाक उल्ला, रजींदर चारै फांसिया दस्स टंगोए दे
बटुकेशवर ते रणधीर दा फोटो बिच छिकाई देआं
अज्ज ललारिया ओढनी मेरी फोटोदार रंगाई देआं ।
सैह्गल,ढिल्लों गोरें दे घर बंबें दी मार चलांदे
उधम सिंह गी लंदन दस्स डायर गी छातिया लांदे
भगदड़ पेई जा गोरें दै, ल्हु डायर दे मुहां बगाई देआं
अज्ज ललारिया ओढनी मेरी फोटोदार रंगाई देआं ।
सिंगापुर दा गदर दस्सेआं, झांसी दे हत्थ रासां
बरमा दे बिच गोरें दियां लासें उप्पर लासां
बरमा बिच सुभाष दियां तूं फौजां बक्ख लड़ाई देआं
अज्ज ललारिया ओढनी मेरी फोटोदार रंगाई देआं ।
खिंद्धा, खपरू लेई गोरें गी दस्सेआं लंदन नसदे
भारत मां दे सिर रखचै अस ओढनी हसदे-हसदे
नमस्कार करै परदेसी जौले हत्थ बनाईं देआं
अज्ज ललारिया ओढनी मेरी फोटोदार रंगाई देआं ।
