अधिकारें दी गुथली

दिक्खेआ में ....
किस चाल्ली पखीमार
हावी होई जंदा
पैंछिये पर
किन्नी बेरेह्‌मी कन्नै
दमैं फंघ फगड़ियै
जकड़ी दिंदा ऐ
इक दूए च गै
ते करी लैंदा काबू
ओह्‌दे पर
ओह्‌दे डोआरी
ओह्‌दे फहराऽ
ओह्‌दे गासै पर ।
तुसें बी ते किश
इʼयां गै कीता ना
फंघें गी जुट्टी रक्खेआ
बड़ियें जुगतें कन्नै
इक गी दुए च
दुए गी पैह्‌ले च
झरैटी रक्खेआ....
स्थगित करदे रेह्
निरस्त करदे रेह्
मेरी डोआरी
जो ही, मेरा अधिकार।  
छपैली दित्ती मेरे च गै
मेरे अधिकारें दी गुथली ।
खट्टी दित्ता उप्परा
कांजीवरम, बनारसी
साड़ियें कन्नै ।
लपटोए दे रेह् उंʼदे च
मेरे पलचोए दे फंघ ।
फंघें दे पोटुएं पर
सजाई दित्तियां
अंगूठियां, बंङां
स्यालै पलेटी दित्ते
शाहतूश, पशमीने ।
बदलोंदे रेह् तुंʼदे तेवर मंदे
जिʼयां-जिʼयां बधे
साड़ियां-बंद्धे ।
कुदरत दे न, अपने नियम कायदे ।
हर शैऽ दी अपनी प्रकृति
जेह्‌की दबाई ते जाई सकदी ऐ
किश चिर
पर बदलोंदी नेईं।
अपना असल रूप-सुआतम
कदें नेईं छोड़दी
टस्स थमां मस्स नेईं होंदी ।
फंघ मेरे बी
नेईं भुल्ले अपना सुआतम
लगातार
चुआके दिंदे
जगांदे, रोआंदे रेह् ।
खुल्ली गेदे न
हत्थें दे कंगन
उंगलियें दियां अंगूठियां।
कांजीवरम ते रेशमी
रस्सें दी घोट
ढिल्ली पेई गेदी हुन।
कसाऽ नेईं मसूस होंदा हुन
हौली, फुल्ल होई गेदी आं में।
गले दा हार
तोआरे दा जतुं थमां
घटोए-सैह्‌मे दे साह्
द्रौड़दे फिरदे न
हास्से-मश्करियां करदे न ।
ते मेरी अवस्था
सुशुप्त थमां जाग्रत ।

खबरै
खरोती कड्ढी दी ऐ में
दफन ही जो
अंदर गै कुतै मेरै
मेरे अधिकारें दी गुथली ।
———————————