आओ, ऐसा अभियान चलाचै, जंगल बड्ढी शैह्र बनाचै
सड़कै कंढै बूह्टे लाचै, नेते दा उद्घाटन करचै
पैसा जेह्ड़ा भेजै मरकज, आपे-बिच्चे बंड़ी खाचै
आओ, ऐसा अभियान चलाचै, जंगल बड्ढी शैह्र बनाचै ।
ऐड़मा, बर्हैंकड़ गे ऐ मुक्की, ग’रना,सैंथा गेआ ऐ सुक्की
रेहा निं कोई किक्कर-फरलाई, अंब, लसूड़ा नां फुल्लै काई
जानवर शैह्रें बिच्च बसाचै, छोले ब्रैडां उʼनेंगी पाचै
आओ, ऐसा अभियान चलाचै, जंगल बड्ढी शैह्र बनाचै ।
सरींह्, कैंबल करने केह्, बड़, बोह्ड़ें बी मल्ले थेह्
धरती उʼनें लेदी मल्ली, धुप्प निं लग्गन दिंदे एह्
जंगल, आओ, बर्हैल बनाचै, गुड्डी-गुड्डी मरूआ लाचै
आओ, ऐसा अभियान चलाचै, जंगल बड्ढी शैह्र बनाचै ।
फ़ोटो खिंचाई बोर्ड लुआचै, कंधां लीकी भरी टकाचै
बिल्ल बनाचै, आपे खाचै, उंʼदा हिस्सा उंʼदै बोझै पाचै
सच्चे-सुच्चे हाकम साढ़े, ऐह्में जानी लाछन लाचै
आओ, ऐसा अभियान चलाचै, जंगल बड्ढी शैह्र बनाचै ।
असें जेह्ड़े बूह्टे लाने, उʼनें आई बड्ढी टकाने
कुतै सरकारी दफ्तर बनने, ऐम्म. ऐल्लें. दे कुतै ठकाने
ऐह्में जानी झेइयां लैचै, बैर उंʼदे नै कैह्सी पाचै
आओ, ऐसा अभियान चलाचै, जंगल बड्ढी शैह्र बनाचै ।
जदूं भट्ठियां चु’ल्ले बलदे हे, जंगल बी फुलदे-फलदे हे
जदुआं दी गैस आई ऐ, जंगलें दी होई तबाही ऐ
आओ, सारे नाह्रे लाचै, जंगलें दी गल्ल कुसी सुनाचै
आओ, ऐसा अभियान चलाचै, जंगल बड्ढी शैह्र बनाचै
बूह्टे लाओ पेड़ बचाओ, गीत एह् सारे मिलियै गाचै
आओ, ऐसा अभियान चलाचै, गीत एह् सारे मिलियै गाचै।
