अमन-भरोसा अजादी ऐ
सतरंगी एह् पड़दादी ऐ
बैरी बनियै किश निं थ्होंदा
होंदी छड़ी बरबादी ऐ
अमन-भरोसा अजादी ऐ
सतरंगी एह् पड़दादी ऐ ।
सिक्का इक बी खुट्टा होई जाऽ
समझो, खान्ना इच खराबी ऐ
बिना वजह दी ठेस पजाना
होंदी एह् लॉब्बी ऐ
बेसमझी ने मूरख बनाया
बत्त जो बैरी साधी ऐ
घर अपना तूं समझी निं सकेआ
दुएं पर की हाबी ऐं
अमन-भरोसा अजादी ऐ
सतरंगी एह् पड़दादी ऐ ।
सोच दमाकै अपनी तेरी
की नीत खोट-खराबी ऐ
समझ ते इक दिन औनी तुगी
केह्ड़ा तेरा ताद्दी ऐ
बिना होश दे ल्हु बगा दा
सूहा किश गलाबी ऐ
तूं आखै अजादी नेईं
पर इत्थै छड़ी अजादी ऐ
ऐह्में करैं शोर-शराबा
कचज्जी बत्त की साधी ऐ
छुड़ी दे तूं बैरी रस्ता
इस बत्ता छड़ी खराबी ऐ
जुल्म निं होन समाज दे अंदर
एह् बी इक वादी ऐ
इक बारी अंदर बड़ियै दिक्ख हां
हिरख जित्थै बेस्हाबी ऐ
अमन-भरोसा अजादी ऐ
सतरंगी एह् पड़दादी ऐ ।
नौजोआन बुढ़ापे दा
इस उमरी दी इक चाब्बी ऐ
हमेशा चलचै इं’दे रस्तै
अक्खीं खोह्ल्ली जागियै
जनम होआ माऊ-बब्बै दै
लोरियां सनांदी दादी ऐ
गोदा एह्दी बौह्न्नें जेल्लै
थ्होंदी छड़ी अजादी ऐ
अमन-भरोसा अजादी ऐ
सतरंगी एह् पड़दादी ऐ ।
मसूम बच्चें दी जिंदगी अग्गें
देशै दी इक चाब्बी ऐ
चंगी बत्ता इ’नेंगी लाना
ईरखी मन त्यागियै
इं’दे अस इम्तेहान दोआचै
आईएऐस्स साधियै
अमन आह्ली डिग्री कराचै
एह् रजल्ट जवाबी ऐ
अमन-भरोसा अजादी ऐ
सतरंगी एह् पड़दादी ऐ ।
हिरखै चल हां ‘कुंडरिया’ तु’म्मी
जित्थै रकार्ड मुसाह्बी ऐ
सब किश थ्होंदा मिलियै जित्थै
हिरखी माह्नू लाब्भी ऐ
बैरी बनियै किश निं थ्होंदा
होंदी छड़ी खराबी ऐ
अमन-भरोसा अजादी ऐ
सतरंगी एह् पड़दादी ऐ ।
