केईं बारी मी सेही होआ
में जो आ, संपूर्ण आं
किश गैप बी ऐ
दुनिया दिक्खियै
फ्ही सेही होआ—
नेईं, नेईं, में ओह् नेईं
जो में होना चाहिदा
फ्ही में नस्सेआ
ओह् बनने तै
जो में चाहेआ
गल्लां उ’ऐ
पर गल्लें दे अर्थ बदलदे रौंह्दे न
अक्खीं उ’ऐ
पर दिक्खने दे ढंग बदलदे रौंह्दे न।
अज्जा तक किन्ने गै दोस्त बदले होने
बदले नेईं बदलोई गे
बनेआ ओह् दोस्त मेरा
कु’त्थै ते कि’यां
कि’यां छिंडे बधदे गे
ते खिंडेआ कि’यां
नां उस चेता
नां मी चेता
पर इन्नी गल्ल साफ बझोंदी
उमरी कन्नै अक्खीं दी ऐनक दा शीशा बदली गेआ
मेरे आंह्गर जिं’दी ऐनक दा हा शीशा
में उं’दे नै रलदा रेहा
इ’यां साबत होंदे रेह् किन्ने गै
लोक फजूल, नकारा
बदलोई दी सोचें ते संदर्भें कन्नै ।
जो गल्ल शैल बझोंदी ही कल्ल
अज्ज की शैल बझोंदी नेईं
जो गल्ल शैल बझोंदी ऐ अज्ज
कल्ल की शैल बझोनी नेईं
गल्लां उ’ऐ
पर गल्लें दे अर्थ बदलदे रौंह्दे न
अक्खीं उ’ऐ
पर दिक्खने दे ढंग बदलदे रौंह्दे न
अर्थ बदलदे रौंह्दे न
भई, ढंग बदलदे रौंह्दे न ।
