अस दूर गास दे पैंछी आं
असें उड्डना खु'ल्ल-मखु'ल्ले
अस निं मनदे मुल्क ते बन्ने
अस आं खु'ल्ले-डु'ल्ले ।
जां अस ठंडे नाड़ू, मोइए
छम-छम प्हाड़ैं बगदे
जां कोई बा-बलूह्ना, अड़िए
इद्धर-उद्धर घुमदे ।
जां अंबरै दे तारे कोई
लिक-लिक मारन लश्कारे
जां फुल्ल खिड़े दे बागैं
थां-थां मैह्क खलारे ।
जां जोगी दी फेरी, मोइए
लगदी थाह्र-बथाह्रै
जां पुरे दी ब्हा सुहामीं
सां-सां चढ़ी लोआरै
जां कोई बद्दल होई परौह्ना
फिरदा द्वारै-द्वारै
पर निं चढ़दा कुसै दे आखै
ब'रदा आपमुहारै ।
अस निं कोई ज्ञानी-ध्यानी
ना कुफर-कसीदे पढ़दे
अस निं मनदे जातां-पातां
अस निं धर्में बझदे
साढ़ा धर्म ते इ'यै, मोइए
अस हिरखै दे पुजारी
साढ़ियां अनसंभियां सोचां
साढ़ी लम्मी डुआरी ।
जेकर उड्डना गासैं-गासैं
आ हां फंघ खलारी
तज्ज हां सब्भै झूठे नाते
छड्ड हां रिश्तेदारी
ते हिरखै दी चढ़ी जा पींह्गा
लेई लै नमां लोआरा
तां गै उसदा दर्शन होंदा
तां गै लभदा नजारा ।
