दूर डंडकारै च
धुप्पा दी मारै च
अस फुल्ल पलाह् दे
मुस्करांदे रौह्न्नें
माघे पांदे रौह्न्नें।
रंग सूहे-सूहे
कोई गलांदा पलाह्
कोई टटूहे।
शिकल दपैह्रीं
तुस करै दे होंदे ओ
बसांऽ कुक्खें च
पर
अस मकै दे होन्ने आं
रुक्खें प।
खिड़ी-खिड़ी खिड़दा
साढ़ा हास्सा
रोन-धोन नेईं असें ई भाखा।
राह् -र्हांदू करदे बसांऽ
दिंदे सीसां ठंडड़ी छांऽ।
सुच्चे
हरे-सैल्लड़े साढ़े पत्तर
चाएं-चाएं कम्हैरी बनांदी
डूने-पत्तल।
सिक्खो मड़ो
साढ़े शा हस्सना
बड़ा शैल, भाइओ
कंढी दा बस्सना।
अस टटूहे
कंढियें दा शंगार आं
कंढियें दी ब्हार आं।
