में अकसर पिच्छें मुड़ियै दिक्खेआ ऐ
जिंदड़ी गी पुच्छेआ ऐ--
बत्त मेरी औखी ही
की इन्ना किश मी जरना पेआ ऐ
की अ'न्नें-बोलें दी बस्ती बिच्च गै
घर मेरा होना हा
रत्तु दी तत्ती झड़ियें बिच्च मेरे बूह्टें की न्हौना हा
जे मेरे भागैं होना हा
ते इ'यै किश की होना हा ?
सुनियै मेरे ताह्न्ने-मीह्ने
जिंदड़ी कल्ल मेरे घर आई
मिगी सद्देआ
कोल बठाइयै
मिगी गलाया, सुन हां भाई—
मिगी घोखना ऐं, मिगी भंडना ऐं
की तूं हर थाह्रा, हर बेल्लै
जे मेरे नै तूं इन्ना गै रोहें ऐं
ते कल्ल सतीं-सबेल्लें बाह्र शैह्र दे
पार त'वी दे आनी मिलेआं इक्कले-मुक्कलें
में तेरे हत्थैं देगी अपनी सारी बत्तें दी चाभी
जिस बत्ता तूं जाना चाहैं
उस बत्ता पर लेइयै जाह्गी
पर, इक शर्त ऐ जे
तूं औगा इस शैह्रा चा सक्खने हत्थैं
कीता वादा, मुंडी ल्हाई
मनो-मनी में बिंद मुस्काया
केह् लैना ऐ
केह् स'लना ऐ
इस शैह्रै चा
केह् ऐ इत्थै ?
अज्ज बडलै जाई पुज्जेआ
बाह्र शैह्र दे
पार तऱवी दे
जिंदड़ी ने र्हानी ने पुच्छेआ—
शर्त तुगी चेतै नेईं ऐ ?
तूं सक्खने हत्थैं औना हा
गंढ तेरे मूंढै कैह्दी ऐ
झकदे-झकदे, संघदे-संघदे
उस्सी गलाया में झित्थे जन
इस गंढै च मेरी औखी बत्तें दे चेते-नाते न
किश कलियां न, किश ग'लियां न
किश अत्थरू न, किश हासे न
लक्ख छोड़ेआ, नेईं छुड़कदे
एह् मेरे न, मी प्यारे न ।
जिंदड़ी बिंद क रेड्डै आई
मेरे अल्ल दिक्खी मुस्काई
में शैह्रै गी वापस मुड़ेआ
मूंढै अपनी गंढ टकाई
गंढ मेरे चेते-नातें दी
मेरी बत्ता पर डु'ल्ली ऐ
एह् जिंदड़ी औखी सेही
हुन उन्नी बी औखी नेईं ऐ
एह् जिंदड़ी कौड़ी सेही
हुन उन्नी बी कौड़ी नेईं ऐ
एह् जिंदड़ी कौड़ी सेही
हुन उन्नी बी कौड़ी नेईं ऐ ।
