एह् फट्ट बी झल्लनें पौने नें
एह् रीत नभाने पौनी ऐ
एह् पीड़ ब्याने पौनी ऐ
एह् प्रीत नभाने पौनी ऐ।
सुखनें दे मोती त्रुट्टने नें
ओह् दिन बी मोइये औना ऐ
पीड़ें दे बद्दल घिरने नें
ओह् दिन बी मोइये औना ऐ
इक बारी जो टुरी जाना
फ्ही कदें नेईं औना ऐ
एह् दर्द बछोड़े दी धूली
असें मत्थे लाने पौनी ऐ
एह् पीड़ ब्याने पौनी ऐ
एह् प्रीत नभाने पौनी ऐ।
एह् खिड़-खिड़ तेरा हास्सा बी
असें उमरी चेत्ते रौहनां ऐ
हत्थें च एह् हत्थ तेरा
कदें खिंडी गै पौना ऐ
एह् जिंद बगान्नी होनी ऐ
पर साहें तुं’दा रौहनां ऐ
किश कम्हलाए फुल्लें दी
असें राक्खी करने पौनी ऐ
एह् पीड़ ब्याने पौनी ऐ
एह् प्रीत नभाने पौनी ऐ।
एह् बांहियें दे हार कुढ़े
असें सप्पें साहीं डंगने ने
एह् भोली भाली सूरत बी
साढ़ी अक्खें घुम्मदी रौहनी ऐ
रुस्सी-रुस्सी तेरा बौहना बी
उमरी लेई रुस्सी बौहना ऐ
किश सुखनें गी सूली लाइए
असें लोथ सजाने पौनी ऐ
एह् पीड़ ब्याने पौनी ऐ
एह् प्रीत नभाने पौनी ऐ।
एह् मिरगें साहीं अक्खें च
म्हेशां मेरा अक्स निं रौहनां
गल्लें कत्थें महफिलें च
म्हेशां मेरा चर्चा निं होना
एह् नीम नशीली गल्लें दी
संझ घरोई जानी ऐ
जरमें-जरमें दी सांझै दी
असें गल्ल भुलाने पौनी ऐ
एह् पीड़ ब्याने पौनी ऐ
एह् प्रीत नभाने पौनी ऐ।
एह् तेरे कौल करारें ने
हौसले बशक बधाए नें
जिद्द तेरी ते पक्की ऐ
कदें बद्दल हत्थें आए ने
एह् हिरख भरोचे खत तेरे
मेरे बड्डे सरमाये ने
इस पूंजी गी आपूं गै
असें तीली लाने पौनी ऐ
एह् पीड़ ब्याने पौनी ऐ
एह् प्रीत नभाने पौनी ऐ।
———————————-
