कंधा-कोठे कच्चे हे, पर सच्चे हे
चौंदे हे, ढौंदे हे, पर गूढ़ी नींदरा सौंदे हे ।
जदुआं दे पक्के पाए दे, असैं दुख गले कन्नै लाए दे
बाह्र बोर्ड लग्गे दा दरोआजे पर
रणधीर सिंह रायपुरिया लखोए दा ।
अंदर कमरा-कमरा बंडोए दा
एह् बैड्डरूम ऐ, किचन एह् ऐ, एह् लाबी ऐ
बक्ख-बक्ख कमरा ते बक्ख-बक्ख चाबी ऐ
असें गी माल्ला आह्ला कोठु ऐ थ्होए दा
बाह्र बोर्डै उप्पर रायपुरिया लखोए दा।
कमरा-कमरा ए.सी. ऐ
साढ़े कोल उ’ऐ पक्खी देसी ऐ
नमदे न, गब्भे न
साढ़े कोल उ’ऐ फट्टी दी खेसी ऐ
छत्तै कन्नै पक्खा लटकोए दा,
बाह्र बोर्डै पर रणधीर सिंह रायपुरिया लखोए दा ।
नां झुंड ऐ, नां झक्क ऐ
अद्धी राती धोड़ी रौंह्दी खप्प ऐ
बोल्लो जे बिंद, सींघी जंदा सप्प ऐ
कुतै थ्होंदी ऐ, कुतै रात भुक्खै गै कटोंदी ऐ
गल्ला-कत्था हर कोई लड़ोए दा
बाह्र बोर्डै पर रणधीर सिंह रायपुरिया लखोए दा ।
मालक आं घरा दा,
छड़ा बिजली-पानी दा बिल्ल देने आस्तै
बच्चें गी स्कूल छोड़ने आस्तै
आटा-दाल ढोने आस्तै
रौह्न्नां सदा लदोए दा
बाह्र बोर्डै पर रणधीर सिंह रायपुरिया लखोए दा ।
