कदें--
कदें-कदें जेठै दी शिकल दपैह्रैं
जेल्लै चिड़ियें दा चीख-झाड़ा
ञ्याणें दा रौला-रप्पा
कुड़ियें दा खिड़-खिड़ हास्सा
सब शांत होई जंदा ऐ
जेल्लै ब्हा सैह्कदी ऐ
ते कोई बी कोयल कूकदी नेईं
इक सन्नाटा जेहा छाई जंदा ऐ
इक सूंकर जेही सनोचदी ऐ
जां फ्ही जदूं पोह् दे पाले पौंदे न
हड्ड-ठार रातैं, कोई त्रिये पैह्र
खड्डा, गिद्दां हू-हू करी चुप्प होई जंदिया न
सारी दुनिया गूढ़ी नींदरैं सौंदी ऐ
चानचक्क मेरी नींदर खु’ल्ली पौंदी ऐ
इक सन्नाटा जेहा छाई जंदा ऐ
इक सूंकर जेही सनोचदी ऐ
जां कदें-कदें में इ’यां गै चुप्प होई जन्नां
छड़ी गल्लें शा गै नेईं विचारें शा बी
ते आपमुहारे दिखदा रौह्न्नां
कु’त्थें...
कोई पता नेईं
असली चुप्प
निरविचार
इक सन्नाटा जेहा छाई जंदा ऐ
इक सूंकर जेही सनोचदी ऐ
एह् बाज कु’त्थों औंदी ऐ?
कदें बझोंदा दूर कुतुआं
खलाऽ चा औंदी ऐ
कदें बझोंदा पताल लोक दी
डूंह्गी, अ’न्नी खाइयें चा औंदी ऐ
कदें बझोंदा इत्थुआं गै कुतुआं
मेरे गै अंदरा
एह् बाज नोखी औंदी ऐ
ते में किश भलखोई जन्ना आं
एह् बाज...
अंदर बाहर
इक मिक करी जंदी ऐ
कुतै एह् बाज उ'ऐ ते नेईं
जिसगी अनहद नाद गलांदे
जां एह् छड़ा भलेखा ऐ
ते पढ़े दे उपनिषद, पुराण
मेरी सोचें उप्पर हावी होई गेदे न
ते में प्रक्षेपत करा करनां
किश दुहारे ख्यालें गी
अपना ज्ञान बनाइयै--
मिथ्या ज्ञान
