कदें आयां मेरे ग्रां
सैल्लियां-सैल्लियां धारां
ठंडी-ठंडी ऐ रुक्खें दी छां
देआर, फकाड़े, चीड़ां, तोस
झुलदे आपमुहारे
बंझ ,करूमन ,कीकर,माहरू लगदे अत्त प्यारे !
करीरा कन्नै हिरख लांदी गोरी
ओआंडली दी माला पांदी
कैंबलुएं नै रंगदी ओंठ
चिउएं दा संदूर बनांदी
बनफ्शें दे फुल्लुएं कन्नै
बालें गी सजांदी
गलाबें दियें पंखड़ियें गी
टल्लुऐं मंझ टकांदी
गलै पांदी हार गुच्छियें दे
भरमोंदी गोरी, अप्पूं गै शरमांदी
फ्ही गिट्टुएं च ढौंदी गोरी
कंडें गी पसेरियै
चुनी लेओंदी आखरे
गिनी-गिनी ब’नदी फ्ही
दपट्टुऐ दिया चूह्का
सूहे-सूहे आखरे
कुंढियें दी सब्जी
करैले दा साग
दडुन्नियै दी चटनी
ते लस्सी दा गलास
मक्कें दी रुट्टी कन्नै
बतरोड़ी दा सुआद
दिक्खने दा लगदा ऐ चाऽ
होग कदें मन तां आयां मेरे ग्रां!
स’ञां बेल्लै राक्खे गुआलू डंगर चरांदे
निक्के-निक्के गीतड़ू कन्नै बंसरी बजांदे
रली- मिली बढदे टाह्लू
गौएं गी खलांदे
भलंगोई फ्ही धम्मने नै
मस्त पींघा पांदे
घरोंदे ध्याड़ै परतोंदे घरै गी
बुक्कल बनकांदे
दुखें दा निं लभदा नशां
होग कदें मन तां आयां मेरे ग्रां
सौने दियां धूरां जि’यां
अंबरै दियां देवियां
फौगनै दी रुत्त पौंगरां पेदियां
माघे दी ठंड फोहे पाले दे
बर्हांदी
निग्घे-निग्घे चेते स्याले दे नुआंदी
बोलदा ऐ मनेरें पर कां
होग कदें मन तां आयां मेरे ग्रां।
नील ते नुलाईं जाड़ें दी शान
रिक्ख, चित्तरे बधांदे प्हाड़ें दा मान
रंग-बरंगियां तितलियां गुट्टियें पर बौंह्दियां
चमेड़ियां, गुटारियां सेउएं गी खंदियां
कोयलै दी कूह्क कन्नै कूह्कू भाख लांदा
मिट्ठे-मिट्ठे सुरैं किश गल्ल समझांदा
ठंडा नीर नाड़ुएं दा
कलेजै ठंड पांदा
खेतरें दे मंझ सारें दी बांऽ
होग कदें मन तां आयां मेरे ग्रां।
