कन्नी—
अपने अंदरै दी दुनिया गी कलावै च लेई बी
परती-परती निक्खड़िऐ-खिलरियै बी
समुंदरै दी औंदियां-जंदियां लैह्रां
कन्नो-कन्नी खेडने दी लालसा करदियां न।
किश ख्वाहिशां पूरियां होंदियां न
किश अधूरियां गै रेही जंदियां न
पूरियां औन जां नेईं
तां-बी अमेद बनी रौंह्ने दी लालसा करदे न।
मेल-बिछोह् मनै दे अन्दर पनपियै
तां-बी नेईं बिछड़नै-मिलियै
दवैं एहसास कुदरत दा नियम
कन्नो-कन्नी गै रौह्ने दी लालसा करदे न।
ज़िन्दगी ऐ ते माड़ी-चंगी रीझ बी ऐ
रीझ सुख-दुख दी बजह ऐ
एह् जानदे होई बी
जीने दी लालसा ते सब्भै करदे न।
दरेआ दे कंढै कदें मिलदे नेईं
तां-बी बरोबर चलदे होई
इक्कले बगदे पानी दा साथ नभांदे
कन्नो-कन्नी रौंह्ने दी लालसा करदे न।
—————————————-
