कान्नी रुस्सी दी ऐ
काकलें कोला
नस्सदी ऐ दूर
जि’यां ओह् कोई गैर मर्द होऐ।
ओह् पाना चांह्दी ऐ
मेरा साथ
मेरा स्पर्श
ते मिलना चांह्दी ऐ
मेरे च
जि’यां दो पुड़ मिलदे न तरकालें
फ्ही डुलना चांह्दी ऐ
काकल पर
ते होना चांह्दी ऐ
अक्खर-अक्खर
ते
करना चांह्दी ऐ
सृजन।
इक प्रेम गीत दा
क्या इ’यां गै
सृजन होंदा ऐ कुसै गीत दा?
शैद- हां
की जे
तुसेंगी किश रचने आस्तै
अपनी कान्नी कन्नै
रलना पौंदा ऐ
मिलना पौंदा ऐ
बौह्ना पौंदा ऐ
ते बरतनी पौंदी ऐ
पूरी इमानदारी
ते सच्चाई
फ्ही पौंगर दा ऐ
इक ऐसा गीत
जिं’दे च
सच्चाई होग
अपनापन होग
ते प्रेम
निश्छल।
————————-
