सुन-मसुन्नी रात काली कु'न्न बनाई
दिक्खना-समझना आ'ऊं तारें दी लोई
खड़ोइयै बेह्ड़ै दिक्खां उप्परै
निम्मोझान चन्न, लब्भै नुक्करै
बल्लें- बल्लें रात टुरी पेई
कुत्तेँ-बिल्लियेँ पाई खोह्-मोही
सुन-मसुन्नी रात काली कु'न्न बनाई?
कनेहा एह् जीवन सार ऐ
दिनै मनुक्खेँ दा कम्म-काज ऐ
रातीं पक्खरुं-पखेरुऐं जनौरें दा राज ऐ
थकन नेईं बोल्ली-बोल्ली रोई-रोई
सुन-मसुन्नी रात काली कु'न्न बनाई?
कुदरत दी ऐ सारी माया
सभनें उप्पर इसदी छाया
जनेही मरजी होऐ देह्-काया
कट्टनी अत्थरूं धोई-धोई
सुन-मसुन्नी रात काली कु'न्न बनाई?
बल्लें- बल्लें टुरै जिदूं दा ठेला
जा निकली, हत्थ निं औंदा बेल्ला
जाना निं कन्नै कठेरे दा धेल्ला
टुरै कर कर्म ढोई-ढोई
सुन-मसुन्नी रात काली कु'न्न बनाई?
मन-चित शांत जंदा होई
गूढी नींदरा रातीं जन्ना सोई
मन-भानें सुखनें दी लोई
रातीं दे अत्थरुएं लैना न्होई
सुन-मसुन्नी रात काली कु'न्न बनाई?
दिक्खनां-समझनां आ'ऊं तारें दी लोई।
