निक्कियां-निक्कियां किश गल्लां
जेह्कियां नजरअंदाज निं
कीतियां जाई सकदियां
ओह् समझ आइयै बी
कदें-कदें समझ कशा बाह्र होंदियां न
कदें हिरखै दी मिठ्ठी फुहार बझोंदियां न
ते किश गलतफैमियां दा अधार होंदियां न।
दिल ते दिमाक दे मझाटै
झूजदियां ते जज्बात दे कन्नै परोती दियां
गल्लां अक़सर दिलै इच्च गै
कढोइयै दबोई जंदियां।
ओह् कुसै तफान आह्ला लेखा मनै
इच्च गै फिरदियां रौंह्दियां चौह्रे पैहर
ते जज्बात आह्ले निक्के-निक्के दाने
प्होंदे रौह्न्दे मनै दे घराटे आह्ली चक्की इच्च।
ओह् गल्लां फ्ही खाई जंदियां
सारा बजूद जि'यां सिनक बड्डे बूह्टे गी अंदरों-अंदर
खाई मुकांदी ऐ
उ'आं गै चलदे-फिरदे
माह्नुए दी खोखली देह् इच्च सवाए साह् दे
किश निं रौंह्दा
ते गल्लां जबान इच्च आइयै
चुप्प होई जंदियां न
पर दिलै इच्च
इक गागर आह्ला लेखा छलकदियां रौंह्दियां
जिंदगी दे खीर तगर ।
———————————-
