सदियें शा बाबल दी पग्गै दा
एह् बोझ ढोंह्दियां आइयां ने
सारे गै त्याग की इं’दे गित्तै
एह् बी ते मापे जाइयां ने।
कुन्न हा जि’न्न ऐ रीत बनाई
अपने ल्हुयै शा फरयाद कराई
"मिगी रक्खी लै अज्ज दी रात वे"
अपनी गै धीयू शा एह् खोआया
"अज्ज दी दिहाड़ी रक्ख डोली निं मां,
र’वां बाप दी बनके गोली निं मां"
कुन्न हा ओह् इ’न्ना बेक्यासा
जिसदे हिरदै दरद निं मासां
कुन्न बनाए ऐ सुहाग मदानियां
वास्ते देई करोआई लेइयां
धीयें बैहनें शा कुरबानियां।
कदें-कदें में सोचदा रौह्नां
ओह् धर्मी कि’यां होई सकदा ऐ
जेह्का बाबल आखी सकदा ऐ
" इक्क इट्ट पटाई देगा,
धिये घर जा अपने"
क्या, एह् घर ओह्दा घर नेईं?
कदें-कदें में एह् बी सोचदा रौह्नां
कुड़ियां गै की आखदियां आइयां
"साढ़ा चिड़ियें दा चंबा वे,
बाबल असें उड्डरी जाना"
क्या, एह् घर ओह्दा घर नेईं?
—————————-
