दुद्ध-बिस्कुट उट्ठी खन्नां, कन्नै झूटैं कारां
शैंपु कन्नै तुई नुहालन इस घरै दियां नारां ।
सोफें-मंजें पर तूं खेढैं, लाडु लाई सुआलन
पुत्तर-बच्चु आखी-आखी सारे तुई कुआलन
मेरी गल्ल कोई नेईं सुनदा, तेरियां समझन सारां
शैंपु कन्नै तुई नुहालन इस घरै दियां नारां ।
बाह्रा जेह्का औंदा कोई, पुच्छै तेरा हाल
कु'त्थै मेरा पुत्तर-बच्चु, कुऱत्थै मेरा लाल
गंद तेरा आ'ऊं सु'ट्टी-सु'ट्टी, फ्हिर बी खन्नां मारां
शैंपु कन्नै तुई नुहालन इस घरै दियां नारां ।
तूं उं'दी नेईं राखी करदा, आ'ऊं करना आं तेरी
तेरे गल ते पट्टा पेदा, सौगल गिट्टै मेरी
तेरा थाह्रा आह्म्मीं होंदा, करदा मौजां-ब्हारां
शैंपु कन्नै तुई नुहालन इस घरै दियां नारां ।
चार बजै में उट्ठी बुढ़नां, अद्धी रातीं सौन्नां
फ्हिर बी दिक्खो खिंझा करदे डैडी-मम्मी-मोन्ना
इस ढिड्डा दी खातिर इं'दी गल्लां सुनां हजारां
शैंपु कन्नै तुई नुहालन इस घरै दियां नारां ।
