दुद्ध बिस्कुट उट्ठी खन्ना कन्नै झूटें कारां
शैम्पू कन्नै तुई नुहालन इस घरै दियां नारां।
सोफें मंजें पर तूं खेढें लाडू लाई सुआलन
पुत्तर बच्चू आखी-आखी सारे तुई कुआलन
मेरी गल्ल कोई नेईं सुनदा तेरियां समझन सारां
शैम्पू कन्नै तुई नुहालन इस घरै दियां नारां।
बाह्रा जेह्का औंदा कोई पुच्छै तेरा हाल
कुत्थें मेरा पुत्तर बच्चू कुत्थें मेरा लाल
गंद तेरा अ’ऊं सुट्टी-सुट्टी फिर बी खन्ना मारां
शैम्पू कन्नै तुई नुहालन इस घरै दियां नारां।
तूं उं’दी नेईं राखी करदी अ’ऊं करना आं तेरी
तेरे गल ते पट्टा पेदा सौंगल गिट्टै मेरी
तेरी थाह्रा आमीं होंदा करदा मौजां ब्हारां
शैम्पू कन्नै तुई नुहालन इस घरै दियां नारां।
चार बजे में उट्ठी बुढ़ना अद्धी रातीं सोनां
फिर बी दिक्खो खिंझा करदे डैडी मम्मी मोन्ना
इस ढिड्डा दी ख़ातिर इं’दी गल्लां सुना ज्हारां
शैम्पू कन्नै तुई नुहालन इस घरै दियां नारां।
——————————————————
