बच्चे ने बाज च
माऊ गी पुच्छेआ
मां, में कु’त्थुआं आया?
बूह्टे उप्परा
जां
कोई परी मिगी तेरे कोल छोड़ी गेई?
माऊ ने मुस्करांदे होई आखेआ--
ना तूं मिगी बूह्टे परा लब्भेआ
ना गै कोई परी तुगी
मेरे कोल छोड़ी गेई।
तूं ते कदूं दा
मेरे मनै च हा
मेरी इच्छाएं च हा
मेरे बचपने दे गुड्डियें-खढौनें च हा
मेरे कोआरे हासे च हा
मेरे सुखने सरीनियें च हा।
में जिसलै ठौकरें दी पूजा करदी ही
उं’दे च मी तूं गै लभदा हा
में तेरी भी पूजा करी ओड़दी।
तूं ते मेरे आसै-पासै गै हा।
पर इक दिन
तूं मेरे अंदर खिड़न लगा
तेरे कन्नै-कन्नै में भी खिड़न लगी
नमें जीवन दी
लोई च
रोशनी च
बगदा-बगदा
तूं इस दुनिया च आया।
तूं मेरी खुशियें दी संदूकडी़ ऐं, मेरे बच्चू
तूं मेरी कुल दुनिया ऐं, मेरे बच्चू।
