कां-गटारां—
इक कोयल आई पुज्जी सैल्ले बाग-दोआरै
सैह्ज-भा, अल्हड़पुनै गांदी आपमुहारै ।
मिशरी मिट्ठी बोल्ली उसदी, सजरे गीत ही गांदी
जि’यां ‘गान गंधर्वा’ अशकें नमें सुर ही लांदी ।
उस बागै दे मोतवार हे इल्लड़, कां, गटारां
उ’ऐ बने दे बड्डे गवैये, उ’ऐ चतर गतारां।
उस कोयल गी दिक्खी आखन—अजें ऐं तूं ञ्याणी
गाने दी किश मत्त निं भाखी, बनी दी गीतो रानी ।
दस्स हां, केह्ड़ा गुरु धारेआ, दस्स हां, केह्ड़ा घराना
साढ़े बागैं उ’ऐ गांदा, जो सिक्खेआ-सखाया स्याना ।
जे तूं सखेतरू, बेगुरपीरी, गुरु लै असेंई मन्नी
असें पढ़े दे शास्त्र केईं, गंडा तुगी देगे ब’न्नी ।
कोयल दिखदी बिटर-बिटर, एह् केह्ड़ा संगीत
पेदा कैंको-रौला जेह्का, इस्सी आखन एह् गीत
इक्कली ही कोयल बचारी, रली गे कां-गटारां
ठुङें-ठुङें कां छेड़दे , चैं-चैं करी गटारां ।
इन्ने च इक तोते गी किश क्यास हा आया
मार डुआरी मैह्लैं पुज्जा, राजे गी सब सनाया ।
सुनी माजरा, मायूस राजै, मूर्खें गी समझाया
ल्हु-लुहान तुसें करी टकाई, एह् केह् जुल्म कमाया ।
मूढ़-मत्तो, कां-गटारैं कदूं कोयल गी गान सखाया
गान गंधर्वा कोयल ने एह् जन्मजात गुण पाया ।
फ्ही राजा बोल्लेआ, आ धी रानी, तूं निं हो दुआस
तेरे गीत मिशरी-मिट्ठे, तेरे लेई खु’ल्ला गास ।
अंबैं पेदे बूर, चल मेरे मैह्लें दे बागैं
कोयलें दे गीत निं होंदे, हर बागै दे भागैं।
उत्थै तेरियां चाचियां-बुआं गांदियां मिट्ठे गीत
उत्थै निं कोई कां-कां, चैं-चैं, बस सुरगी संगीत ।
मार डुआरी उड्डरी गेई, पुज्जी अंबें दे बागैं
सब कोयलां करन मल्हार, धी पुज्जी घर मापैं ।
अजें बी सुनेआ, सैल्ले बागैं कैंको-रौले पौंदे
जे सनोचै कोयल गांदी, कां-गटारां ठुङन पौंदे ।
