ध्रूड़--
मन बड़ा जिद्दी ऐ
मूंह्-जोर ऐ
शुरू कोला गै
में एह्दी हर गल्ल
एह्दे सब्भै नाज-नखरे
एह्दियां सारियां रीणियां
में सिर-मत्थे पर चुकदा आयां
हुन मेरा मन बड़ा गै
नित्तल ते चिक्खड़ होई गेदा ऐ
मेरी इक निं सुनदा
भलेआं आखै निं लगदा
मेरे जमीर कन्नै
एह्दी म्हेशा खिच्च-ध्रूड़ लग्गी रौंह्दी ऐ
पर एह् हर बारी
ओह्दे पर हाबी होइयै
उस्सी दबाई लैंदा ऐ
जां उस्सी नींदरै दी गोली देइयै
सोआली ओड़दा ऐ
आपूं पैह्रेदार बनी जागदा रौंह्दा ऐ
कदें नां कदें
जदूं
एह्दियें जादतियें दी हद्द होई जाह्ग
तदूं तंग पेइयै
जमीर ने जागना ऐ
ते बगावत करियै
एह्दे चुंगल चा बाह्र निकली औना ऐ ।
