चन्न तारें दी गोदा पलेआ, देसा दा करसान
उद्दम, हीला, खेढ-खढाली, मेह्नत उसदी जान।
जग दा दाता ऐ अन्नदाता, कु’न कोई इसगी जानै
मिट्टी दा पुतला मिट्टी रलेआ, सब गी एह् पन्छानै
खेतर-खुंबे मित्तर इसदे, भागें गी सराह्न
चन्न तारें दी गोदा पलेआ, देसा दा करसान
उद्दम, हीला, खेढ-खढाली, मेह्नत उसदी जान।
रत्तु दे संग परसा इसदा मोती बनियै चमकै
खिड़-खिड़ हस्सै दाना-दाना बिच्च कोह्लै दे ठनकै
इ’यै इसदी नेक कमाई, इ’यै इसदी शान
चन्न तारें दी गोदा पलेआ, देसा दा करसान
उद्दम, हीला, खेढ-खढाली, मेह्नत उसदी जान।
पत्तर-पत्तर, डाह्ल्ली-डाह्ल्ली गीत खुशी दे गांदे
आया नमां जमान्ना लोको,घर-घर जाई सुनांदे
जुग मशीनी आया भाइयो, गीत मशीनां गान
चन्न तारें दी गोदा पलेआ, देसा दा करसान
उद्दम, हीला, खेढ-खढाली, मेह्नत उसदी जान।
