खुशियें दे अज्ज गीत गाई लैओ
अज्ज ‘मानता दिन’ मनाई लैओ
संस्था दे झंडे दे हेठ, सज्जनो
तुस कविता दी जोत जलाई लैओ ।
डुग्गर दे हे वीर लखारी ओह्
ते आए हे बारी- बारी ओह्
मां बोल्ली दी करियै सेवा ओह्
गे अपना हे कर्ज तुआरी ओह् ।
अज्ज तुसें बी फर्ज नभाना ऐ
एह्कड़ा दिन सज्जनो मनाना ऐ
ओह् अपना फर्ज नभाई गे सब
मिलियै तुसें अपना नभाना ऐ ।
की दिन अस अज्ज मनाचै नेईं
की गीत खुशी दे गाचै नेईं
दिन थ्होआ एह् बड़े गै जत्नें नै
की अज्ज भांगड़े पाचै नेईं !
अठमीं अनुसूची दी भाशा हुन
कैह्दी ऐ असेंई निराशा हुन
बोल्लो मड़ो सारे खु'ल्लियै हुन
करो शर्म-झक्क नेईं मासा हुन ।
भाशा नेईं एह् लाचारें दी
नेईं अनपढ़ें हुन गुआरें दी
जुड़े इस नै अज्ज विद्वान मड़ो
सिरमौर एह् अज्ज सरदारें दी ।
निं भाशा होंदी कोई बी चंगी माड़ी ऐ
नेईं बोल्लो मड़ो कदें बी मन मारियै
एह् ते ध्वनियें दी व्यवस्था ऐ इक, सज्जनो
कोई बी कुसै कोला लैंदा नेईं दुहारी ऐ ।
इस करी करो भाशा पर मान, सज्जनो
साहित्य जिस दे ऐ बिच आलीशान, सज्जनो
मां धर्मै दी बनाइयै कदें बनदी निं इज्जत
अपनी माऊ नै गै बनदी पन्छान, सज्जनो ।
जै डुग्गर, जै डोगरी.
