तिल, चौल ते गुड़ रलाइयै
खूब बनाओ तरचौली जी
बैर-बरोध ते मुट-सुट छुड़ियै
बंडेओ कौल्ली-कौल्ली जी।
हिरखै कन्नै बंडेओ लोह्ड़ी
मती बंडो, भामें बंडेओ थोह्ड़ी
त्रुट्टे दे रिश्ते लौएओ जोड़ी
पाएओ नेईं बिंद रौली जी
बंडेओ कौल्ली-कौल्ली जी ।
भेद-भाव निं मनै च पालो
प्रीतै कन्नै तुस लोह्ड़ी बालो
ठुर-ठुर सीत ते धुंद बी नस्सै
दूर नस्सै रुत्त सौली जी
बंडेओ कौल्ली-कौल्ली जी ।
गचक, मुरमुरा, बंडेओ मलूक
हिरखै कन्नै गै करेओ सलूक
लोह्ड़ी देवती गी मत्थे टेको
बाहीं च ब’न्नियै मौली जी
बंडेओ कौल्ली-कौल्ली जी ।
हिरख-प्यार दे तेहार न सारे
बंडेओ हिरख-प्यार तुस सारे
जख ठंडा एह् मौसम मुक्कै
तौले आवै रुत्त भोली जी
बंडेओ कौल्ली-कौल्ली जी ।
तिल, चौल ते गुड़ रलाइयै
खूब बनाओ तरचौली जी
बैर-बरोध ते मुट-सुट चुड़ियै
बंडेओ कौल्ली-कौल्ली जी।
