पीड़ पछांती नेईं कुसै, पाई खूस-म-खूस
खुब्भे पैर जो अपने, दलदल होआ मसूस।
अपने पैर फसे जे खोब्भै, लगी पे छड़कन
सांभे दे सम्लोहै नेइयों, मनै दी धड़कन
भले-भलें दा मारचदा, गेआ फ्हिरी खलूस
खुब्भे पैर जो अपने, दलदल होआ मसूस।
जि’नें गी पीड़ बगान्नी दे, निं लग्गे बिंद क्याफे
शब्द मखीरी बोल्लियै ओह्, लांदे रेह् लफाफे
रेह् फुलांदे खुदगर्जी दे, जेह्ड़े नित्त फलूस
खुब्भे पैर जो अपने, दलदल होआ मसूस।
समें शा पैह्लें किश कुसैगी, कदूं ऐ थ्होआ
माह्नू मूढ़मता गै इत्थै, बामरा होआ
कदें सफलता पर निं होंदा, इत्थै यरो मरूस
खुब्भे पैर जो अपने, दलदल होआ मसूस।
सुख कुसै दा पचदा निं ते, सलगै अग्ग कलेजै
उड्डरी जंदी नींदर रातीं, कंडे चुभदे सेज्जै
आई गै जंदी नेह् मनें चा, बिंद क नोखी लूस
खुब्भे पैर जो अपने, दलदल होआ मसूस।
सब क्यासी मौका मिलदे, छुड़दे सदा पछाड़ी
मुंहै पर हमदर्दी दस्सी, लांदे चांभड़ताड़ी
फ्ही लोक न आखदे फिरदे, ‘केसर’ दकियानूस
खुब्भे पैर जो अपने, दलदल होआ मसूस।
