रिश्तें दे धागें च
गंढ पौने मगरा
गंढ गी कोसने, आह्लेओ
गंढ दा बी अपना इक वजूद ऐ
अपनी इक म्हत्ता ऐ
बगैर गंढ दे ते कोई माला बी नेईं
जिस माला च गंढ नेईं
ओह् माला, माला नेईं
ओह् बेल होई सकदी ऐ
कुसै झौंगरे बूह्टे दी
जिसदे दौं लड़
इक दुए कन्नै जुड़ने च असमर्थ होंदे न
गंढ ते ब’न्नियै रखदी ऐ माला दे दौं सिरें गी
हिरखै दे गले पर
गंढ ब'न्नी रखदी ऐ हर किसमै दे भावें दे खलार गी
हिरदै दे पल्लड़ू कन्नै
आत्मा ते परमात्मा गी बी ते
गंढ गै ब’न्नियै रखदी ऐ
गंढ ब’न्नियै रखदी ऐ इक सुहागन दे सुहाग गी
कुसै पाक-पवित्र बंधन च
गंढ ब’न्नियै रखदी ऐ
हर किसमै दे जीवें
जां नर्जीवें दे वजूद गी
धरतरी दे आकर्शन कन्नै
ओह् गंढ गै ऐ जेह्ड़ी ब’न्नियै रखदी ऐ
पैंछियें दे डुआर गी खलाऽ दे खालीपन कन्नै
ते
गंढ गै ब’न्नियै रखदी ऐ नजरें दे पैरलल जाबियें गी
कुसै इक्क नुक्ते पर
बगैर गंढ दे कोई माला नेईं
बगैर गंढ दे कोई रिश्ता नेईं।
